ကရင်လက်နက်ကိုင်အစုအဖွဲ့တွေ KNU ရဲ့ ဦးဆောင်မှု အောက်မှာ တစုတစည်းတည်းပူးပေါင်းကြဖို့ KNU ဥက္ကဋ္ဌ က ဒီနေ့မှာကျရောက်တဲ့ ကရင်အမျိုးသားအာဇာနည်နေ့မှာ တိုက်တွန်းလိုက်ပါတယ်။
ကရင့်လက်နက်ကိုင်အစုအဖွဲ့တွေဟာ ကိုယ့်အဖွဲ့ရပ်တည်နိုင်ဖို့နဲ့ ကိုယ်ကျိုးရှာနေကြသူတွေမဖြစ်စေဖို့ လုပ်ရပ်တွေကို ပြန်လည်ဆန်းစစ်ဖို့လိုအပ်နေပြီလို့လည်း KNU ဥက္ကဋ္ဌက အသိပေးပါတယ်။
တခုတည်းသော ဦးဆောင်မှုနဲ့ တခုတည်းသော ရည်မှန်းချက်အောက်မှာ ပြန်လည်စုစည်းပြီး ကြိုးပမ်းကြဖို့လိုနေပြီလည်း ဆိုပါတယ်။
စည်လုံးညီညွှတ်မှုကိုတည်ဆောက်ရာမှာ မတူညီတဲ့အတွေးအမြင်တွေကို ဘေးဖယ်ထားပြီး အပြစ်တင်မှုတွေကိုရှောင်ကြဉ်ကာ အပြန်အလှန်နားလည်မှုနဲ့ ပူးပေါင်းကြရမယ်လို့ ကရင့်လက်နက်ကိုင်အဖွဲ့အစည်းတွေကို KNU ဥက္ကဋ္ဌက ပြောပါတယ်။
ဒါမှသာ ကရင်အမျိုးသားခေါင်းဆောင်ကြီးတွေရဲ့ရည်မှန်းချက်ကို အကောင်အထည်ဖော်နိုင်မယ်လို့လည်း ဒီနေ့မိန့်ခွန်းမှာ KNU ဥက္ကဋ္ဌက ထည့်သွင်းအသိပေးခဲ့ပါတယ်။
KNU ဟာ ပြည်တွင်းမှာ ဝါရင့် အင်အားကြီး တိုင်းရင်းသားလက်နက်ကိုင်အဖွဲ့ကြီး ဖြစ်ပေမယ့် အဖွဲ့ထဲကနေသီးခြားခွဲထွက်တာတွေကို ကြုံခဲ့ရပါတယ်။
ယခင်စစ်အစိုးရလက်ထက်မှာ KNU ကနေ DKBA ခွဲထွက်ခဲ့သလို DKBA ဆီကနေ စစ်တပ်လက်အောက်ခံ နယ်ခြားစောင့်တပ် (BGF) ဆိုပြီး ထပ်မံခွဲထွက်သွားတာရှိခဲ့တာပါ။
ပြီးခဲ့တဲ့ နှစ်အတွင်းမှာလည်း KNU လက်အောက်ခံကရင်အမျိုးသားကာကွယ်ရေးတပ်(KNDO ) ရဲ့ စစ်ဦးစီးချုပ် တာဝန်ကနေ ရပ်ဆိုင်းခံရတဲ့ ဗိုလ်မှူးချုပ်စောနယ်ဒါမြဟာ ကော်သူးလေတပ်မတော် ( KTLA)ကို သီးခြားထောင်တာတွေရှိခဲ့ပါတယ်။
