“ကြာအင်းဆိပ်ကြီးမှာ CDM တွေ တောင့်ခံခဲ့တာ ၂နှစ်ကျော်ပါပြီ။ တော်လှန်ရေးလည်း အောင်ပွဲနီးနေပါပြီ။ ကူညီမှုတွေကို အရေးကြီးတဲ့နေရာမှာ ကူညီကြပါ။ ကျနော်တို့ ကျင့်သားရနေပါပြီ” – မြို့နယ်(ပအဖ) တာဝန်ရှိသူ
သက်ဝေ/People’s Spring
ကရင်ပြည်နယ် ကြာအင်းဆိပ်ကြီး မြို့နယ်ရှိ CDM ရဲတပ်ဖွဲ့ဝင်ပြည်သူ့သားကောင်းများအား ထောက်ပံ့ငွေပေးအပ်ပွဲကို ယနေ့(ဇွန်လ ၁၈ရက်) တွင် လွတ်မြောက်နယ်မြေတစ်နေရာ၌ ပြုလုပ်ခဲ့ကြောင်း မြို့နယ်ပြည်သူ့အုပ်ချုပ်ရေးအဖွဲ့ (ပအဖ)က သတင်းထုတ်ပြန်သည်။
အဆိုပါ ထောက်ပံ့ငွေပေးအပ်ပွဲကို ကြာအင်းဆိပ်ကြီးမြို့ လွတ်မြောက်နယ်မြေရှိ မီးအိမ်ရှင်ဆေးခန်း၌ ပြုလုပ်ခဲ့ကြောင်း ဖော်ပြသည်။
ပြည်သူ့ရင်ခွင်၏ ထောက်ပံ့မှုကို တစ်ကြိမ်မှ မရရှိသေးသော ရဲ CDM ခုနစ်ဦးအား ပြည်သူ့ရင်ခွင်ထောက်ပံ့မှုဖြင့် ကြာအင်းဆိပ်ကြီးမြို့နယ် ပြည်သူ့အုပ်ချုပ်ရေးအဖွဲ့က တစ်ဦးလျင် ဘတ်ငွေ ၁,၀၀၀ (ကျပ် ၈၅,၀၀၀)စီပေးအပ်ခဲ့ကြောင်း ထုတ်ပြန်သည်။
ကြာအင်းဆိပ်ကြီးဒေသရှိ CDM များအတွက် လိုအပ်ချက်ကို ကြာအင်းဆိပ်ကြီးမြို့နယ် ပအဖ အဖွဲ့များက ကျားကန်ပြီး လုပ်ပေးနေကြောင်း၊ အခြေခံလိုအပ်ချက်များ အားနည်းခြင်း မပြည့်စုံခြင်းရှိသော်လည်း စုစည်းဖြေရှင်းနေကြောင်း ကြာအင်းဆိပ်ကြီး(ပအဖ) တာဝန်ရှိသူတစ်ဦးက ပြောသည်။
“ကြာအင်းဆိပ်ကြီးမှာ စီဒီအမ်တွေတောင့်ခံခဲ့တာ ၂နှစ်ကျော်ပါပြီ။ တော်လှန်ရေးလည်း အောင်ပွဲနီးနေပါပြီ။ ကူညီမှုတွေကို အရေးကြီးတဲ့နေရာမှာ ကူညီကြပါ။ ကျနော်တို့ ကျင့်သားရနေပါပြီ”ဟု ကြာအင်းဆိပ်ကြီး မြို့နယ်(ပအဖ) တာဝန်ရှိသူက ပြောသည်။
