ချင်းပြည်နယ်ရဲ့ နယ်မြေ ၇၅ ရာခိုင်နူန်းကို စစ်အာဏာသိမ်းတာ သုံးနှစ်ပြည့်မြောက်ပြီးနောက် ဒေသခံကာကွယ်ရေးတပ်ဖွဲ့ဝင်တွေက ထိန်းချုပ်ထားနိုင်ပြီလို့ ချင်းရေးရာ အဖွဲ့ချုပ် (ICA) ရဲ့ထုတ်ပြန်ချက်ကဆိုပါတယ်။
စစ်အာဏာသိမ်းမှု ၃ နှစ်တာကာလအတွင်း ချင်းပြည်နယ်မှာ တိုက်ပွဲပေါင်း ၉၀၀ ကျော်ဖြစ်ပွားခဲ့ကာ စစ်ကောင်စီတပ်စခန်း ၂၄ ခုကို ဒေသခံကာကွယ် ရေးတပ်ဖွဲ့တွေက သိမ်းပိုက်ခဲ့ကြပြီး ရဲစခန်း ၁၂ ခုကို စစ်ကောင်စီက စွန့်လွှတ်ခဲ့တယ်လို့ ချင်းရေးရာအဖွဲ့ချုပ် (Institute of Chin Affairs) ကထုတ်ပြန်ပါတယ်။
ချင်းပြည်နယ်က ကန်ပက် လက်မြို့နယ်ထဲက မကွီအိမ်နူးရဲစခန်း၊ ထန်တလန်မြို့ရဲစခန်းနှင့် လုံလဲရ်တပ်စခန်း၊ ဖလမ်းမြို့နယ် ဗာရ်တပ်စခန်း၊ ရိခေါဒါရ်အမှတ်(၁) နှင့် (၂)တပ်စခန်း၊ သွီဘွာလ်တပ်စခန်း၊ ထင်းရှူးတပ်စခန်း၊ ခမ်းပတ်မြို့ရဲနှင့်တပ်စခန်း၊ တီးတိန်မြို့ နယ်ထဲက ကနေဒီ တောင်တပ်စခန်းနှင့် သိုင်းငင်းတပ်စခန်း၊ မတူပီမြို့နယ်ထဲက လိုင်းလင်းပီမြို့တပ်စခန်း၊ ရေဇွာတပ် စခန်း၊ ထယ်ဘွေ တပ်စခန်း၊ ဟားခါးမြို့နယ်ထဲက ဘုံဇုံးတပ်စခန်း၊ ပလက်၀မြို့နယ်ထဲက တရွန်အိုင်ဗျူဟာကုန်းတပ် စခန်း၊ နူံးဘူးဗျူဟာကုန်းတပ်စခန်း၊ ပွိုင့်(၃၇၇) ခ၀ဲဗျူဟာကုန်းတပ်စခန်း၊ ရှင်းလက်၀တပ်စခန်း၊ တောင်ရှည် ဗျူဟာတပ်စခန်း၊ ခလရ(၂၈၉) တပ်ရင်းဌာနချုပ်၊ ခန်ခတောင်ဗျူဟာတပ်စခန်း၊ မီး၀တပ်စခန်း နှင့် နှမဒါဗျူဟာတပ်စ ခန်းတို့ဖြစ်တယ်လို့ ချင်းရေးရာအဖွဲ့ချုပ်ဖော်ပြချက်အရသိရပါတယ်။
ဆူရ်ခွာမြို့ရဲစခန်း၊ နာရိန်းမြို့ရဲစခန်း၊ ဝန်းသိုတပ်စခန်း ၊ဆာဘောင်သဲရဲစခန်း၊ ဝေဘုလရဲစခန်း၊ ဒါရ်ခိုင်ရဲစခန်း၊ သံတောင်ရဲစခန်း၊ လုံငိုစခန်း၊ ရမ်းကြီးရဲစခန်း သီးကီးရ် စခန်း၊ မွောင်တလန်းရဲစခန်း၊ ကပ်သဲလ်စခန်း တွေကိုတော့ စစ်ကောင်စီက အလိုအလျောက်စွန်ခွာသွားကြတာဖြစ်တယ်လို့သိရပါတယ်။
ချင်းပြည်နယ်ရဲ့ မြို့ပေါ်တွေမှာပဲ စစ်ကောင်စီတပ်တွေရှိ တော့တာ ဖြစ်ပါတယ်။
” ပြီးခဲ့တဲ့ ဇန်နဝါရီလထဲမှာ သိုင်းငင်းစခန်းကိုသိမ်းလိုက်နိုင်တော့ ကြားစခန်းမရှိတော့ဘူး။ သိုင်းငင်းစခန်းဟာ နောက်ဆုံးကြားစခန်းပဲ” လို့ ချင်းပြည်နယ်မြောက်ပိုင်း တီးတိန်မြို့နယ် ဒေသခံတစ်ဦးက ပြောပါတယ်။
ချင်းပြည်နယ်မှာ စစ်ကောင်စီကြားစခန်းမရှိတော့တာကြောင့် မြို့ပေါ်မှာရှိနေတဲ့ စစ်ကောင်စီတပ်တွေဆီကို စစ်ကောင်စီအနေနဲ့ မြေပြင်လမ်းကနေ ဆက်သွယ်ဖို့ မဖြစ်နိုင်တော့ဘူးလို့လည်း ဒေသခံတွေက ဆိုပါတယ်။
ချင်းပြည်နယ် အနောက်မြောက်ပိုင်း ပလက်ဝနယ်ကစစ်ကောင်စီတပ်စခန်းတွေကိုတော့ AA ကတိုက်ခိုက်သိမ်းပိုက်နေတာဖြစ်ပါတယ်။
ချင်းပြည်နယ်မြောက်ပိုင်း တွန်းဇန်မြို့နယ်မှာတော့ စစ်ကောင်စီလက်အောက်ခံ ZRA အဖွဲ့ရဲ့ စစ်ရေးလှုပ်ရှားမှုရှိနေတယ်လို့လည်း ဒေသခံတွေဆီကသိရပါတယ်။
