စစ်ကိုင်းတိုင်း၌ အအေးပိုနေ၍ စစ်ရှောင်များ ဖျားနာနေပြီး အနွေးထည်၊ စောင်နှင့်မိုးကာများ လိုအပ်နေ

ရာသီဥတုအေးနေ၍ စစ်ကိုင်းတိုင်းအတွင်းရှိ စစ်ဘေးရှောင်များ ဖျားနာမှုများဖြစ်ပွားနေပြီး အနွေးထည်၊ စောင်နှင့် မိုးကာများလိုအပ်နေကြောင်း ဒေသတွင်းသတင်းရင်းမြစ်များက ပြောသည်။

ဒီဇင်ဘာလလယ်အတွင်းမှ ယခု ဇန်နဝါရီလဆန်းပိုင်းအထိ စစ်ကိုင်းအတွင်း အအေးပိုနေ၍ စစ်ရှောင်များ အအေးမိ၍ ဖျားနာမှုများဖြစ်ပွားနေကြောင်း ဒေသတွင်း စစ်ရှောင်ကူညီနေသူများက ပြောသည်။

“များတယ်။ တစ်ပတ်ကို လူတစ်ရာကျော်လောက်ရှိတယ်။ ကုပေးနေရတယ်”ဟု ရွှေဘိုခရိုင်အတွင်း စစ်ရှောင်အရေး ကူညီပေးနေသည့် S&C မီးဘေးစစ်ဘေးပညာရေး ကူညီစောင့်ရှောက်ရေးအဖွဲ့မှ တာဝန်ရှိသူတစ်ဦးက ပြောသည်။

စစ်ဘေးရှောင်များမှာလည်း တောတွင်းနေရာများ၌ အဆင်သင့်ရာနေရာများတွင် ရှောင်တိမ်းနေရသဖြင့် စောင်နှင့် အနွေးထည်များ အရေးပေါ်လိုအပ်နေကြောင်း ခင်ဦးမြို့နယ်သတင်းမှန်ပြန်ကြားရေးအဖွဲ့ တာဝန်ရှိသူက ပြောသည်။

မိုးကာများမှာမူ ယာယီတဲများတွင် အသုံးပြုရန် လိုအပ်နေခြင်းဖြစ်ကြောင်း ဒေသတွင်းစစ်ရှောင်ကူညီနေသူများက ဆိုသည်။

စစ်ကိုင်းတိုင်းအတွင်း စစ်ဘေးရှောင်အရေအတွက် သိန်းချီရှိနေပြီး စစ်ကောင်စီစစ်ကြောင်း၏ အခြေအနေပေါ်မူတည်၍ တိမ်းရှောင်နေရသည်။