ယင်းမာပင်မြို့နယ် ချင်းတွင်းမြစ်အတွင်း၌ စစ်ကောင်စီတပ်ရိက္ခာတင်ရေယာဉ်များ လုံခြုံရေးယူပေးနေသည့် ခြေလျင်စစ်ကြောင်း ယနေ့ နံနက် တိုက်ခိုက်ခံရပြီးနောက် ညနေပိုင်းတွင်ကျေးရွာများအား လက်နက်ကြီးများဖြင့် ပစ်ခတ်နေကြောင်း သတင်းရရှိသည်။
အင်အား ၁၀၀ခန့်ရှိသော စစ်ကောင်စီ၏ ခြေလျင်စစ်ကြောင်းသည် ယနေ့ နံနက် ၁၀နာရီခန့်က ယင်းမာပင်မြို့နယ် သံဗိုလ်ကျေးရွာနှင့် ပန်းတိမ်ပြင်ကျေးရွာအနီး ရောက်ရှိလာစဉ် ပြည်သူ့ကာကွယ်ရေးမဟာမိတ်တပ်ဖွဲ့များက တိုက်ခိုက်ခဲ့သည်။
ထို့နောက် ညနေဘက်တွင် စစ်ကောင်စီတပ်က အဆိုပါ ကျေးရွာနှစ်ရွာကို လက်နက်ကြီးဖြင့် ပစ်ခတ်နေခြင်းဟု ယင်းမာပင်မြို့နယ်မှ ပြည်သူ့ကာကွယ်ရေးရဲဘော်တစ်ဦးက ပြောသည်။
“မနက်က တိုက်ပွဲမှာ သူတို့(စစ်ကောင်စီတပ်)အထိနာတယ်ထင်တယ်။ ညနေမှာ စစ်ရှောင်နေတဲ့ ပြည်သူတွေကို လက်နက်ကြီးတဲ့ပစ်တာ။ ပြည်သူ ငါးဦး၊ ခြောက်ဦးလောက်ထိတယ်။ တစ်ဦးက သေဆုံးတယ်လို့ ကြားတယ်”ဟု အထက်ပါ ရဲဘော်က ပြောသည်။
စစ်ကောင်စီရေယာဉ်အုပ်စုသည် ယင်းမာပင်မြို့နယ်ဆိပ်ကမ်းတွင် ဇူလိုင်လနှောင်းပိုင်းကတည်းက ကမ်းကပ်ထားပြီး ခြေလျင်စစ်ကြောင်းနှစ်ကြောင်းက မြစ်ကမ်းဘေးရှိ ကျေးရွာများအား စစ်ကြောင်းထိုးနေခြင်းဟု သိရသည်။
အဆိုပါ စစ်ကြောင်းကြောင့် စုန်းချောင်း၊ကျောက်မှော်၊ သံဗိုလ်၊ စေသူနှင့် ပန်းတိမ်ပြင်ကျေးရွာတို့မှ ဒေသခံများ ဘေးလွတ်ရာတိမ်းရှောင်နေကြရသည်။
စစ်ကောင်စီရေယာဉ်များ ယင်းမာပင်ဆိပ်ကမ်း၌ ရှိနေစဉ် ပြည်သူပိုင်မော်တော်ရေယာဥ်များအနေဖြင့် ချင်းတွင်းမြစ်အတွင်း မောင်းနှင်သွားလာခြင်းမပြုကြရန် နဂါးညီနောင်အထူးတပ်ဖွဲ့ (DBTF)က သတိပေးထားသည်။
အဆိုပါစစ်ကောင်စီရိက္ခာတင် ရေယာဉ်အုပ်စုသည် ဇူလိုင်လလယ်က ပခုက္ကူမြို့မှ ဧရာဝတီမြစ်ကြောင်းအတိုင်းမှ ချင်းတွင်းမြစ်အတွင်းဝင်လာပြီး ယင်းမာပင်မြို့တွင် ကမ်းကပ်ထားခြင်းဖြစ်သည်။
ချင်းတွင်းမြစ်အတိုင်း အထက်သို့ဆန်တက်ပါက ကနီ၊မင်းကင်းနှင့် ကလေးဝမြို့များသို့ ရောက်မည်ဖြစ်သည်။ ထို့ကြောင့် ကာကွယ်ရေးတပ်ဖွဲ့များနှင့် ဒေသခံပြည်သူများ သတိပြုကြရန် ယင်းမာပင်မြို့မှ ပြည်သူ့ကာကွယ်ရေးတပ်ဖွဲ့များက သတိပေးထားသည်။
