စစ်​ကောင်စီတပ်သား ၃၀၀ ခန့် အိန္ဒိယနိုင်ငံထဲထပ်မံထွက်​ပြေး နှစ်လ​ကျော်အတွင်း အိန္ဒိယထွက်​ပြေး​သောစစ်သား ၇၀၀ ဦးခန့်ရှိလာ

မြန်မာနိုင်ငံဖက်မှ အိန္ဒိယနိုင်ငံ၊ မီဇိုရမ်ပြည်နယ်သို့ စစ်ကောင်စီတပ်ဖွဲ့၀င် ၂၇၈ဦး ယနေ့ (ဇန်န၀ါရီ ၁၇ရက်နေ့) ညနေပိုင်းတွင်ထပ်မံ​ရောက်ရှိလာ​ကြောင်း အိန္ဒိယ ဒေသတွင်းသတင်းဌာနများက​ဖော်ပြသည်။

စစ်ကောင်စီတပ်ဖွဲ့၀င် ၂၇၈ဦး သည် မြန်မာနိုင်ငံဘက်ခြမ်းတွင်ဖြစ်ပွား​​​သောတိုက်ပွဲများ​ကြောင့် မြန်မာ- အိန္ဒိယနယ်စပ်

မီဇိုရမ်ပြည်နယ်၊ လောင်တလိုင်ခရိုင်၊ ဘန်ဒို့ဘာန်းရွာသို့ ထွက်ပြေးရောက်ရှိလာကြခြင်းဖြစ်​ကြောင်းသိရသည်။ အိန္ဒိယ၏ နယ်ခြား​စောင့်တပ်ဖြစ်​သော အာသံရိုင်ဖယ်တပ်ဖွဲ့ထံသို့ လက်နက်ချ ၍ ခိုလှုံခဲ့ကြခြင်းဖြစ်​ကြောင်း ​ဒေသတွင်းသတင်းဌာနဖြစ်​သော The Lawngtlai Post က​ဖော်ပြသည်။

ပလက်ဝဒေသအတွင်း စစ်ကောင်စီ၏ နောက်ဆုံးလက်ကျန် “ခန်ခတောင်ဗျူဟာ” စခန်းကို ရက္ခိုင့်တပ်​တော် -AA က ဇန်နဝါရီလ (၁၃) ရက်နေ့တွင် စခန်းသိမ်းတိုက်ပွဲတိုက်ခိုက်ရာ စစ်​ကောင်စီတပ်သားများမှာ အိန္ဒိယနိုင်ငံ ဘက်အတွင်းသို့ ထွက်ပြေးသွားခဲ့ကြ​ကြောင်း AA က ဇန်နဝါရီ ၁၄ ရက်တွင်ထုတ်ပြန်ထားသည်။

အိန္ဒိယတပ်မ​တော်ကာကွယ်​ရေးဦးစီးချုပ် ဗိုလ်ချုပ် ပန်ဒီက လည်း လွန်ခဲ့သည့် နှစ်လအတွင်း မြန်မာနိူင်ငံဘက်မှည စစ်​ကောင်စီ တပ်သား ၄၁၆ ဦး နယ်စပ်ဖြတ်​ကျော်၍ အိန္ဒိယနိုင်ငံသို့ ဝင်​ရောက်လာခဲ့​ကြောင်း​ပြောသည်။ ထို​ကြောင့် ချင်းပြည်နယ်နှင့် ရခိုင်ပြည်နယ်တိုက်ပွဲများတွင် စစ်ရှုံးပြီး အိန္ဒိယနိုင်ငံဘက်သို့ ထွက်​ပြေး​​သောစစ်​ကောင်စီတပ်သား ၇၀၀ ဦးခန့်ရှိ​နေပြီဖြစ်သည်။

ထိုသို့စစ်​ကောင်စီတက်သားများ အိန္ဒိယနိုင်ငံဘက်သို့ ဆက်တိုက်ထွက်​ပြေးလာ​နေမှု​ကြောင့် အိန္ဒိယအစိုးရမှာလည်း အခက်​တွေ့​နေပြီး နှစ်နိုင်ငံ နယ်စပ်တွင် လွတ်လပ်စွာသွားလာခွင့်မပြု​တော့ဘဲပိတ်ရန်ပင်စဥ်းစား​နေသည်။

အိန္ဒိယအစိုးရက ထွက်​ပြေးလာ​သောစစ်သားများကို စစ်​ကောင်စီသို့ပြန်လည်လွှဲ​ပြောင်း​ပေးခဲ့သည်။ စစ်​ကောင်စီကထိုစစ်သားများကို အခြားစစ်မျက်နှာပြင် ​ရှေ့တန်းသို့ထပ်မံ​စေလွှတ်ပြီး ၊ထိုသို့​စေလွှတ်ခံရ​သော​ကြောင့် ထပ်မံထွက်​ပြေး​သောစစ်သားများလည်းရှိ​​နေသည်။