စစ်ကောင်စီ လက်နက်ကြီးနန့် ပစ်လို့ မြောက်ဦးနယ်က အချေတယောက် ပြင်းပြင်းထန်ထန် ဒဏ်ရာရ

ဒေနိ( ဂျန်နဝါရီ ၇ ရက်နိ) ညဇာ ၄ နာရီခွဲ လောက်မာ စစ်ကောင်စီတပ်က လက် နက်ကြီးပစ်ခတ်မှုကြောင့် မြောက်ဦးမြို့နယ်က အချေတယောက် ပြင်းပြင်းထန်ထန် ဒဏ်ရာရလားကြောင်း သိရပါရေ။

ဒဏ်ရာရလားရေမူဆလင်အချေစွာ မြောက်ဦးမြို့နယ်၊ ပုရိမ်ရွာက အဖ ဦး မောင်ဖြူ နန့် အမိ ဒေါ် မာန်နီဂျာ ရို့၏သား မောင်ဘန်ဒအာလီ (၁၄နှစ်) ဖြစ်ပါရေ။

ဒေနိ ညဇာ ၄ နာရီ​ခွဲ အချိန်လောက်က မြောက်ဦးအခြီစိုက် စစ်ကောင်စီတပ် ခမရ ( ၃၇၇) တပ်ရင်းက လက်နက်ကြီး နန့် (၂) ကြိမ် ယမ်းကား ပစ်ခတ်ခပါရေ။

ယင်းအထဲက လက်နက်ကြီးကျည် ၁ လုံးစွာ ပုရိမ်ရွာပြင်မာ ကျရောက်ပေါက်ကွဲခရေလို့ ဒေသခံတိက ပြောပါရေ။

လက်နက်ကြီးကျည်ကျရောက်ပေါက်ကွဲမှုကြောင့် ရွာပြင်မာ နွား ကျောင်းနီရေ မောင်ဘန်ဒအာလီ ၏ ညာဖက်လိုင်ပင်းမာ လက်နက်ကြီးကျည်စထိမှန်ခပြီးကေ ပြင်းပြင်းထန်ထန် ဒဏ်ရာရလားရေလို့ ဆိုပါရေ။

ယင်းနောက် မောင် ဘန်ဒအာလီ ကို ပန်းမြောင်းဆီးရုံသို့ အရေးပေါ်ပို့ဆောင်ပနာ ဆီးကုသမှုခံယူလျက်ဟိပါရေ။

ရက္ခိုင်မာ ရက္ခိုင့်တပ်တော်AAနန့် စစ်ကောင်စီတပ်ရို့တိုက်ပွဲဖြစ်ပြီးနောက်ပိုင်း စစ်ကောင်စီတပ်က အရပ်သားပြည်သူတိနီထိုင်ရေ ရပ်ရွာ၊မြို့တိကို လက်နက်ကြီး၊ လက်နက်ချေ၊ စစ်သင်္ဘော၊ ဒရုန်း၊ စစ်ရဟတ်ယာဉ်နန့် တိုက်လီယာဉ်တိ အသုံးပြုပြီးကေ ရည်ရွယ်ချက်ဟိဟိ နိစဉ်နိတိုင်း ယမ်းကား ပစ်ခတ်တိုက်ခိုက်လို့ဟိနီပါရေ။