ရှမ်းပြည်တောင်ပိုင်း၊ ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ဆီဆိုင်မြို့နယ်၊ ဆိုက်ခေါင်မြို့မှာ ရပ်ကွက်တစ်ခုစီတိုင်းကို 4 Wheels ကား တစ်စီးစီ ဝယ်ပေးကြဖို့ ပအိုဝ်းပြည်သူ့စစ် (PNA)က ညွှန်ကြားထားတယ်လို့ မြို့ခံတွေက ပြောပါတယ်။
ဧပြီလအစပိုင်းကတည်းက ဆိုင်ခေါင်မြို့ပေါ် ၁၁ ရပ်ကွက်အတွက် ကား ၁၁ စီးစာ PNA က ကောက်ခံနေပြီး ဒီလကုန်ရက် မတိုင်ခင် ထည့်ဝင်ကြဖို့ ဖိအားပေးနေတယ်လို့ ဆိုပါတယ်။
ဆိုက်ခေါင်မြို့ခံ တစ်ဦးက “သူတို့က ရိုးရိုးကားတောင် မဟုတ်ဘူး။ 4 Wheels ဆိုတော့ ဈေးကြီးတယ်လေ။ ဆိုင်ခေါင်မှာ သူဌေးတွေတောင်မှ အဲလို မစီးနိုင်ဘူး။ သိန်းဂဏန်းလောက် ထည့်ရမယ်ဆိုတော့ ကျနော်တို့လည်း မရရအောင် ရှာကြံရမှာပဲ” လို့ ပြောပါတယ်။
လိုင်စင်မဲ့ 4 Wheels ကားတစ်စီးကို အနည်းဆုံး သိန်း ၆၀၀ ခန့် တန်ဖိုးရှိတဲ့အတွက် တစ်အိမ်ကို သာမာန်လက်လုပ်လက်စား လူတန်းစားအတွက် တစ်သိန်းကျပ်နဲ့ လုပ်ငန်းရှင်တွေအတွက် ၃ သိန်းကျပ်ခန့် ပေးဆောင်ရနိုင်တယ်လို့ မြို့ခံတွေဆီက သိရပါတယ်။
ဆီဆိုင်မြို့တိုက်ပွဲစတင်တဲ့ ဇန်နဝါရီလ နောက်ဆုံးအပတ်ကတည်းက ဆိုင်ခေါင်မြို့မှာ PNA က တပ်သားသစ် စုဆောင်းတာ၊ စစ်အသုံးစရိတ် မကြာခဏ ကောက်ခံတာတွေကြောင့် အခုတစ်ကြိမ် ငွေကြေးထည့်ဝင်ဖို့ စီးပွားရေး ကြပ်တည်းနေကြတယ်လို့ ဆိုပါတယ်။
ဆိုက်ခေါင်မြို့၊ တံတားဦးရပ်ကွက်မှာ နေထိုင်သူ တစ်ဦးက “ကျမတို့က ဗမာရပ်ကွက်ဆိုတော့ PNO နဲ့ သိပ်မဆိုင်ဘူးလေ။ ဒါပေမယ့် ထည့်ရမှာပဲ။ လူအများကြီး မထည့်ကြရင်တော့ တမျိုးပေါ့။ ဗမာကလူနည်းစုဆိုတော့ ကိုယ်ပဲ မထည့်ရင် တအားသိတာတဲ့အခါကျတော့ မဆိုင်တဲ့ ကလေးတွေကို ဝင်ဖမ်းမှာစိုးလို့လေ။ မဖြစ်ဖြစ်အောင် ထည့်မယ်လို့ စီစဉ်ထားတယ်” လို့ ပြောပါတယ်။
ပအိုဝ်းကိုယ်ပိုင် အုပ်ချုပ်ခွင့်ရဒေသတွေဖြစ်တဲ့ ဆီဆိုင်၊ ဟိုပုံး၊ ပင်လောင်း စတဲ့ မြို့နယ်တွေမှာ PNA က တပ်သားသစ် စုဆောင်းတာ အပြင် လုပ်ငန်းခွန်၊ ယာဉ်ခွန်၊ စစ်အသုံးစရိတ်၊ ပြည်ပရောက် လူငယ်များဆီက စစ်မှုထမ်း လူစားထိုးခွင့် စရိတ် စတဲ့ ခေါင်းစဉ် အမျိုးမျိုးနဲ့ ငွေကြေး ကောက်ခံနေပြီး တိုက်ပွဲ ပြင်းထန်တဲ့ ဒေသတွေမှာ လူသူမရှိတဲ့ နေအိမ်တွေကိုလည်း ဖောက်ထွင်းခိုးယူမှုတွေ ကျူးလွန်နေကြတယ်လို့ ဒေသခံတွေက ပြောပါတယ်။
