ဒီဇမ်ဘာ ၁ဝ ရက်နိ ညည့်အချိန်မာ ပုဏ္ဏားကျွန်း အခြီစိုက် အကြမ်းဖက်စစ်ကောင်စီ၏ ခမရ (၅၅၀)တပ်ရင်းက ပုဏ္ဏားကျွန်းမြို့ကို လက်နက်ကြီးတိနန့် ရည်ရွယ်ချက်ဟိဟိ ပစ်ခတ်တိုက်ခလို့ နီအိမ်နှစ်ဆောင် ပျက်စီးလားကြောင်း သိရပါရေ။
ဒီဇမ်ဘာ ၁၀ ရက်နိ၊ ညည့် ၁၀ နာရီလောက် ပုဏ္ဏားကျွန်းမြို့အနားတဝိုက်မာ တိုက်ပွဲဖြစ်စ်ပွားခြင်း လုံးဝ မဟိပါဘဲ ခမရ (၅၅၀) တပ်ရင်းကနီ မြို့ကို ဦးတည်ပြီးကေ လက်နက်ကြီး အလုံး ၁၀ ကျော် ယမ်းကား ပစ်ခတ်ခရေလို့ မြို့ခံတိကပြောပါရေ။
အကြမ်းဖက်စစ်ကောင်စီတပ်ပစ်ခတ်လိုက်တေ လက်နက်ကြီးကျည်တိစွာ ပုဏ္ဏားကျွန်းမြို့၊ စံပြရပ်ကွက်၊ ဓမ္မမဏ္ဍိုင် ဘုန်းတော်ကြီးကျောင်းရှိမာ ၁ လုံး၊ စံပြရပ်ကွက်၊ ဦးဌေးအောင်အိမ်ရှိမာ ၁ လုံးနန့် ရွာဟောင်းရပ်ကွက်၊ ဂူဝပိုင်းဟိ ဦးကံထွန်းအိမ်နားမာ ၁ လုံး၊ စုစုပေါင်း ၃ လုံးကျရောက်ပေါက်ကွဲခပြီးကေ၊ လျှပ်စစ်ဖြန့်ဖြူးရီးပင်မဆောင်ဘေးနားဟိ ဓာတ်အားခွဲရုံနားမာ ကျရေ ၁ လုံးကတော့ မပေါက်ကွဲဘဲကျန်နီသိမ့်ရေလို့ ဆိုပါရေ။
ယင်းပိုင် လက်နက်ကြီးကျည် ကျရောက်ပေါက်ကွဲမှုကြောင့် လူထိခိုက်မှုမဟိခကေလေ့ ဦးဌေးအောင်ချေနန့် ဦးကံထွန်းရို့၏အိမ်တိစွာ အိမ်ထရံ၊ ပြူတင်းပေါက်တိ ထိခိုက်ပျက်စီးလားရေလို့ သိရပါရေ။
ကုန်ခရေ နိုဗမ်ဘာ ၂၄ ရက်နိကလည်း အကြမ်းဖက်စစ်ကောင်စီ၏ နေဗီက လက်နက်ကြီးတိနန့် ရည်ရွယ်ချက်ဟိဟိ ယမ်းကား ပစ်ခတ်ခလို့ ပုဏ္ဏားကျွန်းမြို့မဈီး တခုလုံးမီးလောင်ပြာကျလားခရပါသိမ့်ရေ။
