မကွေးတိုင်း၊ ဂန့်ဂေါမြို့နယ်၊ တောင်ခင်ရန်း ရဲစခန်းကို မေလ ၂၅ ရက် ညပိုင်းမှာ လက်နက်ကြီးနဲ့ ပစ်ခတ် တိုက်ခိုက်ခဲ့ရာ စစ်ကောင်စီတပ်သား ၃ ဦးသေဆုံးပြီး အရာရှိတစ်ဦး ဒဏ်ရာရသွားတယ်လို့ ABSDF က ဒီကနေ့ ထုတ်ပြန်လိုက်ပါတယ်။
တောင်ခင်ရန်း ရဲစခန်းဟာ စစ်ကောင်စီတပ်သားတွေ စခန်းချနေသလို ပျူစောထီးတွေ ဝင်ထွက်သွားလာ နေတာဖြစ်လို့ တိုက်ခိုက်ခဲ့တာ ဖြစ်တယ်လို့ ABSDF COLUMN (၃) ပြန်ကြားရေး တာဝန်ရှိသူက ပြောပါတယ်။
“စခန်းထဲကို အဝေးကနေ လက်နက်ကြီးနဲ့ ပစ်တာပါ။ ထိခိုက်ကျဆုံးမှုတော့ ရှိပါတယ်။ ထုတ်ပြန်ချက်မှာလည်း ဖော်ပြထားပါတယ်။ ဒီရက်ပိုင်းလည်း ကျွန်တော်တို့ ABSDF က စစ်ကောင်စီကို တိုက်ခိုက်တာတွေလည်း များတော့လေ” လို့ သူကပြောပါတယ်။
ကျောင်းသား တပ်မတော် ABSDF ရဲ့ထုတ်ပြန်ချက်မှာတော့ တောင်ခင်ရန်း ရဲစခန်းထဲက စစ်ကောင်စီတပ်သား ၃ ဦးသေဆုံးကာ အရာရှိ တစ်ဦး ခြေထောက်ကို လက်နက်ကြီး ကျည်စ ထိမှန်ပြီး ဒဏ်ရာပြင်းထန်တာကြောင့် ခြေထောက် ဖြတ်ပစ်လိုက်ရတယ်လို့ တပ်တွင်း သတင်းရစ်မြစ်ကို ကိုးကား ဖော်ပြထားပါတယ်။
အဆိုပါ တိုက်ခိုက်မှုကို ABSDF Column (၃)၊ အမှတ် (၁၂) တပ်ရင်း၊ ယောဒေသ စခန်းက ရဲဘော်တွေ၊ ဒေသခံ PDF တွေ နဲ့ ပ.က.ဖ တို့ ပူးပေါင်း လုပ်ဆောင်ခဲ့တာဖြစ်ပြီး အထိအခိုက်မရှိ ဆုတ်ခွာနိုင်ခဲ့တယ်လို့ ဆိုပါတယ်။
မေလ ၂၄ ရက်ကလည်း ရှမ်းပြည်နယ် မြောက်ပိုင်း၊ မိုးမိတ်မြို့နယ်၊ ကျောက်မော ရဲစခန်းကို ABSDF က ဝင်သိမ်းခဲ့လို့ တပ်ကြပ်အဆင့်ရှိသူ တစ်ဦး အပါအဝင် ရဲ ၄ ဦး သေဆုံးပြီး လက်နက်ငယ် ၆ လက်ရခဲ့တယ်လို့ သိရပါတယ်။
