ထိုင်းလေပိုင်နက်အတွင်းသို့ မြန်မာစစ်လေယာဉ်များ ကျူးကျော်လာပါက ချက်ချင်း တုံ့ပြန် ပစ်ခတ် အရေးယူရန် ထိုင်းဝန်ကြီးချုပ် Settha Tawisin က ထိုင်းစစ်တပ်နှင့်လေတပ်ကို အမိန့်ပေး ညွှန်ကြားလိုက်ကြောင်း ထိုင်းသတင်းမီဒီယာများက သတင်းဖော်ပြသည်။
ဧပြီလ ၁၁ ရက်နေ့ညပိုင်းတွင် ထိုင်းကာကွယ်ရေးဝန်ကြီး Suthin Klangsaeng က တော်ဝင် အမိန့်ကြေညာချက် တစ်ရပ်ကို လက်မှတ်ရေးထိုးထုတ်ပြန်လိုက်ကြောင်း၊ အဆိုပါ အမိန့်ကြေညာချက်တွင် မြန်မာစစ်ကောင်စီ၏ တိုက်လေယာဉ်များက ထိုင်းလေပိုင်နက်အတွင်း ကျူးကျော်လာပါက ၅ မိနစ်အတွင်း ချက်ချင်း တုံ့ပြန်တိုက်ခိုက်ရန် ကာကွယ်ရေးဝန်ကြီးက လက်မှတ်ရေးထိုးထုတ်ပြန်လိုက်ခြင်းဖြစ်ကြောင်း သိရှိရသည်။
ထိုင်းဝန်ကြီးချုပ်က ထိုင်းစစ်တပ်နှင့်လေတပ်မှ အကြီးအကဲများနှင့် စကားပြောဆိုထားကြောင်း၊ လက်ရှိတွင် အခြေအနေမှာ ထိန်းချုပ်နိုင်သော အနေအထားတွင်ရှိနေကြောင်း၊ ထိုင်းလေပိုင်နက်နှင့် ထိုင်းနယ်မြေကို ထိပါး အသုံးပြုမှုမှန်သမျှကို လုံး၀ လက်ခံမည်မဟုတ်ကြောင်း ၊ ထိုင်း-မြန်မာနယ်စပ်အရေးနှင့်ပတ်သက်ပြီး အချိန်တိုင်း စောင့်ကြည့် ညွှန်ကြားနေကြောင်း ပြောဆိုသွားသည်။
