စစ်ကိုင်းတိုင်း၊ ထီးချိုင့်မြို့နယ်တွင် အကြမ်းဖက်စစ်တပ်နှင့် တော်လှန်ရေးအဖွဲ့များ ၃ ရက်မြောက်အဖြစ် ဆက်လက် တိုက်ပွဲပြင်းထန်နေပြီး စစ်တပ်က လေယာဉ်များဖြင့် ဗုံးကျဲခြင်း၊ လက်နက်ကြီးများဖြင့် ပစ်ခတ်ခြင်းများ ဆက်လက်လုပ်ဆောင်နေကြောင်း ထီးချိုင့်- ပြည်သူ့ကာကွယ်ရေးမှ တာဝန်ရှိသူက ပြောဆိုသည်။
နိုဝင်ဘာလ ၈ ရက်နေ့မှစတင်ပြီး တော်လှန်ရေးတပ်ဖွဲ့များက ထီးချိုင့်မြို့ကို မြို့သိမ်းတိုက်ပွဲ ဆင်နွှဲရန် စတင်တိုက်ခိုက်ပြီး ယနေ့ နိုဝင်ဘာလ ၁၀ ရက်နေ့တွင်လည်း ၃ ရက်ဆက်တိုက် တိုက်ပွဲများ ပြင်းထန်နေကြောင်း၊ ထီးချိုင့်မြို့မှ ပြည်သူများ ပိတ်မိနေကြောင်း သိရှိရသည်။
“လေယာဉ်တွေနဲ့ ဗုံးကျဲတာ မီးရှို့နေပါတယ်။ အလွန်ဆိုးရွားနေပါတယ်။ လောလောဆယ် မြို့ထဲကျန်ခဲ့တဲ့ ပြည်သူတွေက ပုန်းရှောင်ပိတ်မိနေပါတယ်” ဟု ထီးချိုင့်- ပြည်သူ့ကာကွယ်ရေးမှ တာဝန်ရှိသူက ပြောကြားသည်။
စစ်တပ်က လက်နက်ကြီးများဖြင့် နိုဝင်ဘာ ၉ ရက်နေ့ ညပိုင်းကတည်းက လက်ရှိအချိန်အထိ အဆက်အပြတ်ပစ်ခတ်နေပြီး လေယာဉ်ဖြင့်လည်း ဆက်တိုက် ဗုံးကျဲနေကြောင်း သိရှိရသည်။
“အမှတ် ၃ ရပ်ကွက်က တည်းခိုခန်းကတော့ လုံးဝ ပျက်စီးသွားတယ်လို့ သိထားပါတယ်။ လောလောဆယ် လက်နက်ကြီးတွေနဲ့ မနေ့ညကတည်းက ဆက်တိုက် ပစ်နေတာ လေယာဉ်နဲ့လည်း ဒီမနက်တင် ၂ခါ ဗုံးကျဲသွားတာ ” ဟု ထီးချိုင့်- ပြည်သူ့ကာကွယ်ရေးမှ တာဝန်ရှိသူက ပြောကြားသည်။
အကြမ်းဖက်စစ်တပ်၏ လေကြောင်းဖြင့် ပစ်ခတ်မှုများကြောင့် စစ်ကောင်စီတပ်ဖွဲ့ဝင်တချို့ပါ ထိမှန် သေဆုံးမှုများရှိပြီး သက်ကြီးပိုင်း စစ်သားများ သေဆုံးကြကြောင်း၊ လေယာဉ်ဖြင့် ရမ်းသမ်းပစ်ခတ်မှုများ ပြုလုပ်နေ၍ စစ်ဘေးရှောင်ပြည်သူများအတွက် စိုးရိမ်ပူပန်စရာဖြစ်နေကြောင်း ထီးချိုင့် ပြည်သူ့ကာကွယ်ရေးအဖွဲ့ထံမှ သိရှိရသည်။
ထို့ပြင် စစ်တပ်က ထီးချိုင့်မြို့ထဲတွင် နိုဝင်ဘာ ၉ ရက်နေ့ ဆန်အိတ်များကို လုယက်ခဲ့ပြီး ပိုင်ရှင်ဖြစ်သူ အဘိုး ၁ ဦးကိုလည်း စစ်တပ်က သတ်ဖြတ်သွားကြောင်း သိရှိရသည်။
“မနေ့က စစ်သားတွေက ဆန်အိတ်တွေကို ခိုးထုတ်ပြီး ပိုင်ရှင် အသက်ကြီးပိုင်းအဘိုးကို သတ်သွားပါတယ်” ဟု ထီးချိုင့်- ပြည်သူ့ကာကွယ်ရေးမှ တာဝန်ရှိသူမှ ပြောကြားသည်။
