ထီးချိုင့်မြို့အနီး နေရာနှစ်ခု၌ ကချင်လွတ်လပ်ရေးတပ်မတော် (KIA)၊PDFပူးပေါင်းတပ်ဖွဲ့နှင့် စစ်ကောင်စီတပ်တို့ ယနေ့ နေ့လယ်တွင် တိုက်ပွဲများ ပြင်းထန်နေပြီး စစ်ကောင်စီက လေကြောင်းမှ နှစ်ကြိမ်ဗုံးကြဲတိုက်ခိုက်သွားသည်ဟု သတင်းရရှိသည်။
ထီးချိုင့်မြို့နှင့် နှစ်မိုင်ခန့်အကွာမှ ကုက္ကိုယ်ကုန်းနှင့် သခွပ်ချောင်ကျေးရွာသို့ ဝင်လာသော စစ်ကောင်စီစစ်ကြောင်းနှစ်ခုကို KIA၊PDFပူးပေါင်းတပ်ဖွဲ့က ပိတ်ဆို့တိုက်ခိုက်ခဲ့ပြီနောက် တိုက်ပွဲပြင်းထန်နေခြင်းဖြစ်သည်။
” မြို့အထွက်အနားမှာ မဖွင့်ရသေးတဲ့ အရိုးအကြောဆေးရုံရှိတယ်။ အဲ့ဒီနားမှာ ချနေတာ။ လေကြောင်းကနေ ချတာက မင်းဝံတောင်ရိုးမှာ” ဟု ပြည်သူ့ကာကွယ်ရေးတပ်ဖွဲ့ဝင်တစ်ဦးက ပြောသည်။
ထီးချိုင့်မြို့အနီးတွင် ပြီးခဲ့သည့် အောက်တိုဘာ ၁၉ရက်က စစ်ကောင်စီဘက်မှ ရှစ်ဦးသေဆုံးပြီး ရဲနှစ်ဦးကို အရှင်အဖမ်းခံရသည်အထိ တိုက်ပွဲအပြင်းအထန်ဖြစ်ပြီးနောက် နေ့စဉ် တိုက်ပွဲဆက်နေသည်။
ယမန်နေ့( အောက်တိုဘာ၂၈ရက်)က ထီးချိူင့်မြို့ ကြက်သွန်ခင်းကျေးရွာတံတား၌ စစ်ကောင်စီစစ်ကြေင်း ပဒေသာမိုင်းမိခဲ့ပြီး သေဆုံးသူများပြားခဲ့သည်။ ယမန်နေ့ကလည်း လေကြောင်းမှ လာရောက်ပစ်ခတ်သလို ယနေ့တွင်လည်း နံနက် ၁၁ နာရီ ၂၀ မိနစ်နှင့် နေ့လယ် ၁နာရီခွဲတွင် ဂျက်ဖိုက်တာဖြင့် ဗုံးကြဲသွားကြောင်း သတင်းရရှိသည်။
မြေပြင်၌ စစ်ရေးတင်းမာနေ၍ ခရီးသွားကားများ သတိပြုကြရန် တော်လှန်ရေးအင်အားစုများက သတိပေးထားသည်။
