မကွေးတိုင်း၊ ဂန့်ဂေါခရိုင်၊ ထီးလင်းမြို့နယ်၊ ပုလဲ-ဂန့်ဂေါကားလမ်းမဘေးရှိ ရေမျက်နီရဲကင်းစခန်းသိမ်းတိုက်ပွဲ ၂ ရက်ကြာတဲ့အထိ ပြင်းထန်နေဆဲဖြစ်တယ်လို့ ဒေသကာကွယ်ရေးတပ်ဖွဲ့နဲ့ နီးစပ်သူတွေဆီက သိရပါတယ်။
ရေမျက်နီရွာရဲ့ အရှေ့ဘက်မှာရှိတဲ့ ရဲစခန်းကို ကာကွယ်ရေးပူးပေါင်းတပ်ဖွဲ့တွေက ဒီဇင်ဘာ ၄ ရက် မနေ့က မနက် ၃ နာရီလောက်မှာ စတင်သွားရောက်တိုက်ခိုက်ခဲ့ပြီး ဒီကနေ့အထိ တိုက်ပွဲတွေပြင်းထန်နေတာပါ။
“သူတို့ကို အညံ့ခံခိုင်းတာ သူတို့အညံ့မခံတော့ပစ်ခတ်မှုတွေဆက်ဖြစ်နေတာပေါ့။ ကိုယ်တွေဘက်ကလည်း အထိအခိုက်တွေရှိတယ်။ လေကြောင်းသာမလာခဲ့ရင် မနေ့ကတည်းက စခန်းကိုသိမ်းနိုင်ခဲ့ပြီ။ ” လို့ ကာကွယ်ရေးတပ်ဖွဲ့ နဲ့ နီးစပ်သူတဦးက ပြောပါတယ်။
စခန်းသိမ်းတိုက်ပွဲအတွင်း အထိနာနေတဲ့ စစ်ကောင်စီတပ်က မနက် ၈ နာရီကနေ ညနေ ၃ နာရီကျော်တဲ့အထိ လေကြောင်းပစ်ကူမှု ၃ ကြိမ်ထက်မနည်း စခန်းပတ်လည်ကို လာရောက်ပစ်ခတ်ခဲ့တယ်လို့လည်း ဆိုပါတယ်။
ဒါ့အပြင် စစ်ကောင်စီတပ်က ကျောမြို့အခြေစိုက် အမှတ် ၂၃ ကာကွယ်ရေးပစ္စည်းစက်ရုံ(ကပစ ၂၃) တပ်ရင်းက စစ်ကူစစ်ကြောင်းတချို့ရေမျက်နီရဲစခန်းတိုက်ပွဲကို ဒီမနက်မှာပဲ ထွက်ခွာသွားတယ်လို့ ဒေသသတင်းရင်းမြစ်တွေထံက သိရပါတယ်။
ရေမျက်နီရွာက ဒေသခံတွေကိုလည်း တိုက်ပွဲမဖြစ်ခင်ကြိုတင်ရှောင်နိုင်တဲ့အတွက်ပြည်သူတွေ ထိခိုက်သေဆုံးမှုမရှိဘူးလို့လည်း ဆိုပါတယ်။
စစ်တပ်နဲ့ နီးစပ်တဲ့ မီဒီယာတွေဘက်မှာတော့ ရေမျက်နီရဲစခန်းမှာ တိုက်ပွဲတွေပြင်းထန်နေပြီး ၂ ဖက် သေဆုံးမှု ၂၀ ဝန်းကျင်ရှိတယ်လို့ ဖော်ပြထားပါတယ်။
