မြန်မာနိုင်ငံတွင် ရွေးကောက်ပွဲ ကျင်းပရေးနှင့် ဖက်ဒရယ် ဒီမိုကရေစီ ပြည် ထောင်စု တည်ဆောက်ရေးအတွက် အနှောင့် အယှက် ဖြစ်စေနိုင်၍ ဒေါ်အောင်ဆန်းစုကြည်နှင့် ကမ္ဘောဒီးယားဝန်ကြီးချုပ်ဟောင်းဟွန်ဆင်တို့ကို တွေ့ဆုံခွင့်မပေးနိုင်ကြောင်း စစ်ကောင်စီ၏ ပြောခွင့်ရပုဂ္ဂိုလ် အကြမ်းဖက်ဇော်မင်းထွန်းက ပြောဆိုလိုက်သည်။
ယမန်နေ့ အကြမ်းဖက်မင်းအောင်လှိုင်နှင့် ကမ္ဘောဒီးယားဝန်ကြီးချုပ်ဟောင်း ဟွန်ဆင်တို့ ဗီဒီယိုအွန်လိုင်းမှတစ်ဆင့် တွေ့ဆုံကြစဉ် ဒေါ်အောင်ဆန်းစုကြည်နှင့် တွေ့ဆုံခွင့်ရရှိရေး ဟွန်ဆင်၏ တောင်းဆိုမှုအပေါ် ၎င်းက အထက်ပါအတိုင်း တုံ့ပြန်လိုက်ခြင်းဖြစ်သည်။
စစ်ကောင်စီအနေဖြင့် ရှေ့လုပ်ငန်းစဉ် ၅ ရပ် ချမှတ်ထားပြီးဖြစ်၍ ယင်းလုပ် ငန်းစဉ်များကို အနှောင့်အယှက်ဖြစ်စေနိုင်သော လုပ်ရပ်များကို ဆောင်ရွက်မည်မဟုတ်ကြောင်း၊ ဒေါ်အောင်ဆန်းစုကြည်နှင့်ကမ္ဘောဒီးယားဝန်ကြီးချုပ်ဟောင်းတို့ တွေ့ဆုံခွင့်မပြုနိုင်ကြောင်း၊ ယင်းသို့ တွေ့ဆုံခွင့်မပြုနိုင်ခြင်းမှာ ရှေ့လုပ်ငန်းစဥ်များကို အနှောင့်အယှက်ဖြစ်စေနိုင်သောကြောင့် ဖြစ်ကြောင်း ၎င်းက ပြောဆိုသည်။
၂၀၂၂ ခုနှစ် ကမ္ဘောဒီးယားနိုင်ငံက အာဆီယံဥက္ကဋ္ဌ ရာထူးရယူစဉ်ကလည်း ကမ္ဘောဒီးယားဝန်ကြီးချုပ်ဟောင်း ဟွန်ဆင်က ဒေါ်အောင်ဆန်းစုကြည်နှင့်တွေ့ဆုံခွင့်ရရှိရေး တောင်းဆိုခဲ့သော်လည်း စစ်ကောင်စီက ပယ်ချခဲ့သည်။
