နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်မွေးနေ့ အမှတ်တရ ရင်ထိုးလေလံရောင်းချငွေများကို စစ်ဘေးရှောင်များအပါအဝင် လိုအပ်သည့်နေရာ နေရာခြောက်ခုသို့ လှူဒါန်းခဲ့ကြောင်း သရုပ်ဆောင်ဒေါင်းက အသိပေးထားသည်။
“အလှူငွေအားလုံးကို ကရင်နီဒေသရှိစစ်ဘေးရှောင်စခန်းများ၊ အလယ်ပိုင်းဒေသရှိ စစ်ဘေးသင့်ပြည်သူများနှင့် တောထဲရှိရဲဘော်များအတွက် လိုအပ်သောပစ္စည်းအချို့ကို ကူညီမှုပြုခဲ့ပါတယ်ခင်ဗျ။ ကျွန်တော်မမျှော်မှန်းထားတဲ့ ပမာဏ တခုကို လိုအပ်နေသောနေရာတွေမှာတော်လှန်ပြည်သူများကိုယ်စားကူညီပေးနိုင်ခဲ့တဲ့အတွက်အရမ်းပီတိဖြစ်ရပါတယ်”ဟု လေလံတင် ရောင်းချခဲ့သည့် Daung Art Corner ပေ့ခ်ျ၌ ဖော်ပြထားသည်။
ဇွန်လ ၁၉ရက်တွင်ကျရောက်သည့် ဒေါ်အောင်ဆန်းစုကြည်မွေးနေ့အမှတ်တရအဖြစ် ထိုင်းရုပ်ရှင်ဆုပေးပွဲသို့ တတ်ရောက်ရာတွင် ဝတ်ဆင်ခဲ့သည့် မြန်မာပြည်မြေပုံ ရင်ထိုးကို ယင်းပေ့ခ်ျ၌ ဇွန်လ ၁၈ ရက်ညက လေလံတင်ရောင်းချခဲ့ခြင်းဖြစ်သည်။
ရင်ထိုးလေလံတင်ရောင်းချငွေ ကျပ်သိန်း ၁၁၀ ရရှိခဲ့ပြီး ထပ်မံလှူဒါန်းသူများ၏ အလှူငွေများကြောင့် စုစုပေါင်း အလှူငွေ သိန်း ၂၀၀ကျော်ရရှိခဲ့ရာ ယင်းအလှူငွေများကို နေရာ ခြောက်ခုသို့လှူဒါန်းခဲ့ခြင်းဖြစ်သည်။
“ယခုလည်း ဆက်လက်လိုအပ်ချက်တွေကရှိနေဆဲ၊ဒုက္ခရောက်နေဆဲဖြစ်လို့ ထိုပြည်သူများကိုမေ့မထားပဲ တတ်နိုင်သလောက် ကူညီပေးကြဖို့ကိုလည်း မေတ္တာရပ်ခံပါတယ်”ဟု ဒေါင်းက မေတ္တာရပ်ခံထားသည်။
သရုပ်ဆောင်ဒေါင်းသည် အာဏာသိမ်းခံရသည့် အချိန်ကတည်းက ပြည်သူနှင့်အတူ ရပ်တည်ကာ အာဏာရှင်ဆန့်ကျင်ရေးလုပ်ငန်းစဉ်များ၌ ပါဝင်ခဲ့သလို နွေဦးတော်လှန်ရေးအတွက်လည်း အမှတ်တရ ပစ္စည်းများရောင်းချခြင်း ၊ ဇာတ်လမ်းတိုရုပ်ရှင်များရိုက်ကူးခြင်းတို့ကိုပြုလုပ်ပေးနေသူဖြစ်သည်။
