နတ်မောက်မြို့နယ်မှာ စစ်ကောင်စီတပ်တိုက်ခိုက်ခံရလို့ ၁၄ ဦးသေဆုံးဟုဆို

မကွေးတိုင်း၊ နတ်မောက်မြို့နယ်၊ ကျောက်အိုးရွာနဲ့ သပွတ်ပင်ရွာကြားမှာ Canter ကားနဲ့လာတဲ့ စစ်ကောင်စီတပ်ဖွဲ့တွေ ကြားဖြတ်တိုက်ခိုက်ခံခဲ့ရလို့ ၁၄ ဦးခန့်သေဆုံးခဲ့တယ်လို့ အလယ်ပိုင်းတိုင်းစစ်ဌာနချုပ်၊ နေပြည်တော်တိုင်းစစ်ဌာန၊ ဗျူဟာ ၁၊ တပ်ရင်း ၉၀၃ ဂဠုန်တပ် နတ်မောက် အဖွဲ့ဆီကသိရပါတယ်။

တပ်ဖွဲ့ဝင် ၂၅ ဦးခန့်ပါတဲ့ အဲ့ဒီစစ်ကြောင်းဟာ သပွတ်ပင်ရွာကနေ Canter ကားနဲ့ ဒီဇင်ဘာ ၂၄ ရက်မှာ ထွက်လာတာဖြစ်ပြီး နေ့လယ် ၃ နာရီခန့်မှာ ကျောက်အိုးရွာနဲ့ သပွတ်ပင်ရွာကြားမှာ တိုက်ခိုက်ခံခဲ့ရတာ ဖြစ်ပါတယ်။

တိုက်ခိုက်ခံရတဲ့ နေရာအနီးက လူမနေတဲ့အိမ် ၁ လုံးကို စစ်ကောင်စီတပ်သားတွေက မီးရှို့သွားကာ ကျောက်အိုးရွာထဲကို ပြန်သွားတယ်လို့ သိရပါတယ်။

ဒီတိုက်ခိုက်မှုကိုတော့ အလယ်ပိုင်းတိုင်းစစ်ဌာနချုပ်၊ နေပြည်တော်တိုင်းစစ်ဌာန ဗျူဟာ ၁ တပ်ရင်း ၉၀၃ ဂဠုန်တပ် နတ်မောက်နဲ့ သာစည် ပကဖ တို့က ပူးပေါင်းတိုက်ခိုက်ခဲ့တာ ဖြစ်ပါတယ်။