ဖားကန့် – မြစ်ကြီးနားလမ်းရှိ နန့်ယားရွာမှာ ရောက်ရှိနေတဲ့ စစ်ကောင်စီ တပ်မ ၃၃ လက်အောက်ခံ ခမရ – ၁၂ အဖွဲ့က မနေ့ ဩဂုတ် ၂၄ ရက်ညပိုင်းက စစ်ရှောင် ပြည်သူအချို့နဲ့ အဲဒီမှာ ပိတ်မိနေတဲ့ ခရီးသွားပြည်သူ စုစုပေါင်း အယောက် ၁၀၀ ကျော်ကို လူသားဒိုင်းအဖြစ် ခေါ်ဆောင်သွားတယ်လို့ ဒေသခံတွေနဲ့ ခရီးသွား ပြည်သူတွေဆီက သိရပါတယ်။
အဲ့ဒီလိုဖမ်းခေါ်သွားတဲ့အထဲမှာ နန့်ယားဘုရားကျောင်းဝင်းထဲ တိုက်ပွဲရှောင်လာတဲ့ ဒေသခံပြည်သူ အမျိုးသား ၇၀ ခန့် ပါဝင်တဲ့အပြင် လမ်းမှာပိတ်မိပြီး သောင်တင်နေတဲ့ ခရီးသွားပြည်သူတွေနဲ့ သာသနာ့ ဝန်ထမ်း ၂ ဦးကိုလည်း စစ်ကောင်စီတပ်တွေက ခေါ်ဆောင်တဲ့အထဲ ပါသွားတယ်လို့ ဒေသခံတစ်ဦးက ပြောပါတယ်။
“သူတို့ စစ်ကြောင်းမှာ လူသားဒိုင်း အဖြစ်သုံးတာပါ” လို့ အဲ့ဒီဒေသခံက မဲခေါင်သတင်းဌာနကို ပြောပါတယ်။
စစ်ကောင်စီတပ်နဲ့ KIA တို့ တိုက်ပွဲဖြစ်ပွားပြီး ကပ်မှော်ရွာနဲ့ ဆိုင်းဖရာရွာတွေကနေ နန့်ယားရွာက ဘုရားကျောင်းဝင်းထဲ စစ်ဘေးရှောင်နေချိန် စစ်ကောင်စီတပ်ရဲ့ ဖမ်းဆီးခေါ်ဆောင်တာ ခံခဲ့ရတာပါ။
“ညက ဖုန်းလည်း ပြောလို့ မရဘူး။ တည်းခိုခန်းမှာလည်း မအိမ်နိုင်တော့။ ထွက်ပြေးရတယ်။ နန့်ယား အပြင်ဘက် သွားအိပ်ရတာ တညလုံး ခြင်စာ ဖြစ်သွားတယ်။ ကားသမားတွေ တချို့လည်း ထွက်ပြေးရတယ်။ ပြီးမှ ကားပေါ် ပြန်လာရတာ” လို့ အမျိုးသား ခရီးသည် ၁ ဦးက ပြောပါတယ်။
ဒီမနက် ၄ နာရီခန့်မှာ စစ်ကောင်စီရဲ့စစ်ကြောင်း ထွက်ခွာသွားပြီး နန့်ယားကျော်သွားပြီ ဖြစ်တာကြောင့် အဲဒီမှာ ပိတ်မိသောင်တင်နေတဲ့ ခရီးသွား ပြည်သူတွေကို လမ်းဖွင့်ပေးပြီး သွားလာခိုင်းထားတယ်လို့ ပြန်ပိတ်ထားမယ့် အခြေအနေရှိတယ်လို့ သိရပါတယ်။
အမျိုးသားညီညွှတ်ရေးအစိုးရ (NUG)၊ သယံဇာတနှင့်သဘာဝပတ်ဝန်းကျင် ထိန်းသိမ်းရေးဝန်ကြီး ဒေါက်တာတူးခေါင်ကလည်း စစ်ကောင်စီတပ်မ ၃၃ ဟာ မြစ်ကြီးနား-ဖားကန့်လမ်းပေါ်မှာရှိတဲ့ နန့်ယားရွာမှာ စစ်ရှောင်နေသူတွေထဲက အရွယ်ကောင်းအယောက် ၁၀၀ ကို ရွေးထုတ်ပြီး အထမ်းသမားအဖြစ် ခေါ်ဆောင်သွားတယ်လို့ သူရဲ့လူမှုကွန်ယက်အကောင့်မှာ ဒီမနက်ရေးထားပါတယ်။
ပြီးခဲတဲ့ မေလကလည်း ဖားကန့် – တနိုင်း စစ်ကောင်စီ စစ်ကြောင်းဟာ နန့်ယားနဲ့ ခါ့တောင်း ရွာတွေက ဒေသခံ ၃၀ ကျော်ကို လူသားဒိုင်း အဖြစ် ခေါ်ဆောင်သွားခဲ့ဖူးပါတယ်။
