ရှမ်းပြည်နယ်မြောက်ပိုင်း နမ္မတူမြို့နယ်ရှိ စစ်ကောင်စီအထိုင်စခန်းတစ်ခုကို ကချင်လွတ်လပ်ရေးတပ်မတော်(KIA)က စခန်းသိမ်းတိုက်ပွဲဆင်နွှဲနေသည်ဟု စစ်ရေးသတင်းရင်းမြစ်က ပြောသည်။
အောက်တိုဘာ ၂၉ရက် နံနက် ၆နာရီတွင် စစ်ကောင်စီ၏ တပ်စခန်းကို တိုက်ခိုက်နေခြင်းဖြစ်ပြီး စခန်းသိမ်းနိုင်မည့် အလားအလာရှိဟု ပြောသည်။
“သိမ်းနိုင်မှာပါ”ဟု စစ်ရေးသတင်းရင်းမြစ်က ပြောသည်။
စခန်းသိမ်းတိုက်ခိုက်ခံရ၍ စစ်ကောင်စီတပ်ကလည်း တိုက်လေယာဉ် ၂စီးဖြင့်လာရောက် တိုက်ခိုက်နေကြောင်း သတင်းရင်းမြစ်က ပြောသည်။
“သိန္နီကို ကျနော်တို့က ထိုးစစ်ဆင်တိုက်ခိုက်မှုတွေလုပ်တော့လုပ်နေတယ်။ အခြေအနေ အသေးစိတ်တော့ မသိရသေးပါဘူး။ သိန္နီကိုမဟာမိတ် တပ်ပေါင်းစုက သိမ်းပိုက်လိုက်ပြီဆိုတဲ့သတင်းကကြတော့ အတည်မပြုနိုင်သေးပါဘူး။ ကျနော်တို့က ထိုးစစ်ဆင်မှုတွေ တိုက်ခိုက်မှုတွေလုပ်နေတယ်။ လုံး၀ သိမ်းပိုက်ထားတာတော့ မဟုတ်သေးဘူးပေါ့”ဟု ကိုးကန့်တပ်မတော် (MNDAA) ပြောရေးဆိုခွင့်ရှိသူ လီကျာဝင်းက ပြောသည်။
နောင်ချိုမြို့နယ်တွင်လည်း စစ်ကောင်စီတပ်များကို တအာင်းတပ်မတော်(TNLA)နှင့် မန္တလေး PDF တပ်များက တိုက်ခိုက်လျက်ရှိသည်။ နောင်ချို ကျောက်ကြမ်းကျေးရွာရှိ စစ်ကောင်တပ်စွဲရာနေရာကို TNLA၊ MDY PDF ပူးပေါင်းတပ်က ယနေ့နံနက်က တိုက်ခိုက်ရာ စစ်ကောင်စီအလောင်း ၆လောင်းနှင့် လက်နက် ၇လက် သိမ်းဆည်းရရှိခဲ့သည်ဟု TNLAက အသိပေးထားသည်။
နောင်ချိုမြို့ အခြေစိုက် ခလရ (၁၁၄)၊ (၁၁၅) တပ်စခန်းကို TNLAနှင့် မန္တလေး PDFက ဝင်ရောက်တိုက်ခိုက်နေကြောင်း စစ်ရေးသတင်းရင်းမြစ်က ပြောပြသည်။
