နိုင်ငံခြားရေးဝန်ကြီး ဒေါ်ဇင်မာအောင်နှင့် တိုင်းရင်းသားကိုယ်စားလှယ်များ လစ်သူရေးနီးယားလွှတ်တော်အမတ်များနှင့်သွားရောက်တွေ့ဆုံ

အမျိုးသားညီညွတ်ရေးအစိုးရ NUG နိုင်ငံခြားရေးဝန်ကြီး ဒေါ်ဇင်မာအောင်သည် တိုင်းရင်းသားကိုယ်စားလှယ်များနှင့်အတူ လစ်သူရေးနီးယားအာဏာရပါတီလွှတ်တော်အမတ်များနှင့်တွေ့ဆုံကာ အကြမ်းဖက်စစ်ကောင်စီကို ထိရောက်စွာဖိအားပေးနိုင်ရေးဆွေးနွေးခဲ့ကြောင်း သိရသည်။

နိုင်ငံခြားရေးဝန်ကြီး၏ ပထမဆုံးအကြိမ် လစ်သူရေးနီးယားခရီးစဉ်အတွင်း လွှတ်တော်၌ အမတ်များနှင့်တွေ့ဆုံကာ နှစ်နိုင်ငံ ဒီမိုကရေစီအရေး ပိုမိုတိုးမြှင့်ပူးပေါင်းဆောင်ရွက်နိုင်ရေး၊ အကြမ်းဖက်စစ်အုပ်စုအား ထိရောက်စွာ ဖိအားပေးနိုင်ရေးကိစ္စရပ်များကို အပြန်အလှန်ဆွေးနွေးခဲ့ကြောင်း NUG နိုင်ငံခြားရေးဝန်ကြီးဌာနက ထုတ်ပြန်သည်။

လစ်သူရေးနီးယားသည် စစ်ကောင်စီကို ခုခံတော်လှန်နေသည့် မြန်မာပြည်သူများနှင့် ဒိမိုကရက်တစ်နိုင်ငံအတွက် ရုန်းကန်နေမှုများကို အားပေးထောက်ခံကြောင်း ပြောသည်။ ထို့အပြင် ယူကရိန်းအပေါ် ရုရှား၏ကျူးကျော်စစ်ကို ရှုတ်ချခဲ့ခြင်းနှင့် ကုလသမဂ္ဂတွင် ယူကရိန်းကို ထောက်ခံမဲပေးခဲ့ခြင်း တို့အတွက် အမျိုးသားညီညွတ်ရေးအစိုးရကို ကျေးဇူးတင်ကြောင်း လစ်သူရေးနီးယားအမတ်များက ပြောာသည်။

လစ်သူရေးနီးယားသည် မြန်မာ့ဒီမိုကရေစီအရေးကိုတက်ကြွစွာ ကူညီအားပေးနေသည့် နိုင်ငံဖြစ်ပြီး နိုင်ငံခြားရေးဝန်ကြီးဒေါ်ဇင်မာအောင်၏ ပြီးခဲ့သည့် အမေရိကန်ခရီးစဥ်အတွင်းတွင် လစ်သူရေးနီးယားနိုင်ငံခြားရေးဝန်ကြီးနှင့် တရားဝင်တွေ့ဆုံခဲ့ကြောင်း နိုင်ငံခြားရေးဝန်ကြီးဌာနက ထုတ်ပြန်သည်။