အကြမ်းဖက်စစ်တပ်က အာဏာသိမ်းပြီးနောက် အရပ်သားပြည်သူတွေကို သတ်ဖြတ်လျက် ရှိရာမှာ ၂၀၂၁ ခုနှစ် ဖေဖော်ဝါရီလကနေ ၂၀၂၄ ခုနှစ် မတ် ၁၈ ရက်အထိ စာရင်းတွေ အရ ကျဆုံးခဲ့ရသူ ၄၇၂၀ ဦး အထိ ရှိပြီဖြစ်တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေး အသင်း (AAPP)က ထုတ်ပြန်လိုက်ပါတယ်။
အေအေပီပီအနေနဲ့ အတည်ပြုရန်လိုအပ်နေတဲ့ အမည် စုံစမ်းဆဲ သတ်ဖြတ်ခံရသူ (၁၅၀၀) ဝန်းကျင် စာရင်းကို လည်း သီးခြားပြုစုထားတယ်လို့ အသိပေးထားပါတယ်။
နိုင်ငံရေးအကျဉ်းသားများကူညီစောင့်ရှောက်ရေးအသင်း (AAPP) ရဲ့မှတ်တမ်းပြုချက်တွေ အရ ၂၀၂၁ ခုနှစ် ဖေဖော်ဝါရီလ ၁ ရက်နေ့ကနေ ၂၀၂၄ ခုနှစ် မတ် ၁၈ ရက်အထိ ဖမ်းဆီးချုပ်နှောင် ခြင်းခံထားရသူ စုစုပေါင်း ၂၆၂၄၆ ဦးရှိပြီး ယင်းတို့ထဲမှာ ၂၀၁၁၄ ဦးမှာ ထိန်းသိမ်းခံနေရ ဆဲဖြစ်ကာ အဆိုပါ ထိန်းသိမ်းခံထားရသူများအနက် ၈၈၄၁ က ထောင်ဒဏ်ချမှတ် ခံထားရတယ်လို့ ဖော်ပြထားပါတယ်။
မတရား ပြစ်ဒဏ်ကျခံရသူထဲက (၁၂၃) ဦးက သေဒဏ်ချမှတ်ခံထားရတာပါ။ မျက်ကွယ် သေဒဏ်ချမှတ်ခြင်းခံ ထားရသူ (၄၃) ဦး အပါအဝင် (၁၁၉) ဦးမှာ မျက်ကွယ် ပြစ်ဒဏ်ချမှတ်ခြင်းခံထားရတယ်လို့ ဆိုပါတယ်။ အဲဒီစာရင်းတွေအရ သေဒဏ်ချမှတ်ခံထားရသူ စုစုပေါင်း ၁၆၆ ဦးရှိ ပြီဖြစ်တယ်လို့လည်းဖော်ပြထားပါတယ်။
ဖမ်းဆီးခံရပြီးနောက် ပြန်လည်လွတ်မြောက်လာတဲ့ အရေအတွက်က ၆၀၄၈ ရှိတယ်လို့ ဆိုပါ တယ်။ ဖော်ပြပါ ကိန်းဂဏန်းအရေအတွက်တွေက AAPP မှ ကောက်ယူရရှိထားတဲ့ အရေအတွက် ဖြစ်ပြီး မြေပြင်မှာ ဖြစ်ပွားနေတဲ့အချက်အလက်နဲ ကိန်းဂဏန်းအရေအတွက်တွေက ယခုထက်ပိုမိုများပြားနိုင်တယ်လို့ ဖော်ပြထားသလို အချက်အလက်တွေ ထပ်မံကောက်ယူရရှိ လာပါက ဆက်လက်ထည့်သွင်းဖော်ပြသွားမယ်လို့ ဆိုပါတယ်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်းရဲ့ မှတ်တမ်းနှင့် သုတေသနဌာနမှ စောင့်ကြည့်လေ့လာမှုအရ စစ်ဘေးရှောင်ပြည်သူ အရေအတွက်မှာ တိုးမြင့်လာပြီး လူသားချင်း စာနာထောက်ထားတဲ့ အကူအညီများ လိုအပ်လျက်ရှိနေတယ်လို့လည်း ဖော်ပြထားပါတယ်။
အရပ်ဘက်အဖွဲ့အစည်းရဲ့ ခေါင်းဆောင်တွေ၊ အရပ်သားတွေ၊ တက်ကြွလှုပ်ရှားသူတွေ၊ သတင်း သမား တွေ၊ CDM လှုပ်ရှားနေတဲ့ ဝန်ထမ်းတွေစတဲ့ နယ်ပယ်အသီးသီးက မည်သူမဆို ဖမ်းဆီး၊ ထိန်းသိမ်း၊ တရားစွဲဆိုခြင်းခံထား ရတာတွေနဲ့ နွေဦးတော်လှန်ရေးကာလအတွင်း ကျဆုံးသွားသူ တွေရဲ့ အချက်အ လက်တွေကို သိရှိပါက နိုင်ငံရေးအကျဉ်းသားများ ကူညီစောင့်ရှောက်ရေး အသင်း (AAPP) ကို ဆက်သွယ်ဖို့လည်း ဖော်ပြထားပါတယ်။
ကျဆုံးအချက်အလက်တွေအတွက်ဆိုရင် [email protected] အီးမေးလ်သို့လည်းကောင်း၊ အဖမ်းအဆီးအချက် အလက်တွေဆိုရင် [email protected] အီးမေးလ်သို့လည်းကောင်း တိုက်ရိုက်ပေးပို့ ဆက်သွယ် အကြောင်းကြားနိုင်တယ်လို့ ဖော်ပြထားပါတယ်။
