ဧရာဝတီတိုင်း၊ ပန်းတနော်မြို့တွင် မြို့နယ်အဆင့်စစ်ကောင်စီအုပ်ချုပ်ရေးမှူးဖြစ်သူဗိုလ်မှူးက ဌာနဆိုင်ရာ ဦးစီးမှူးတစ်ယောက်အား အများပြည်သူမြင်ကွင်း၌ ပါးရိုက်ပြီး ရိုက်နှက်ကန်ကျောက်ခဲ့သည်ဟု မြို့ခံများကပြောသည်။
“Non အချင်းချင်း အာဏာပြတာ။ လောင်းကစားဝိုင်းကနေ စဖြစ်တဲ့ ပြဿနာ။ ဗိုလ်မှူးဇေယျာလင်းက အား/ကာဦးစီးမှူးကို လမ်းလယ်မှာ ဒူးထောက်ခိုင်းပြီးပါးရိုက်တာ။ဒီကိစ္စက Non တွေကြားထဲ တော်တော် ပွဲဆူနေတယ်” ဟု မြို့ခံတစ်ဦးကပြောသည်။
ဖြစ်စဉ်မှာ ဒီဇင်ဘာလ ၂၃ရက်ညက ပန်းတနော်မြို့နယ် အားကစားနှင့်ကာယပညာဦးစီးဌာနမှူးသည် အနောက်ပိုင်းရပ်ကွက် ၊ ဗိုလ်ချုပ်လမ်းရှိ စားသောက်ဆိုင်တစ်ဆိုင်တွင် စားသောက်ဆိုင်ပိုင်ရှင်နှင့် လောင်းကစားကိစ္စစကားများရာမှာ ဆိုင်ပိုင်ရှင်က မြို့နယ်စစ်ကောင်စီအုပ်ချုပ်ရေးမှူးဗိုလ်မှူးဇေယျာလင်းကို ဖုန်းဆက်တိုင်ကြားခဲ့ကြောင်းသိရသည်။ ထို့နောက် ဗိုလ်မှူးဇေယျာလင်းရောက်ရှိလာပြီး အားကာဦးစီးမှူးကို ရိုက်နှက်ခြင်းဖြစ်ကြောင်း မြို့ခံများကပြောသည်။
ထိုဖြစ်စဉ်အား ပန်းတနော်မြို့နယ်ထွေအုပ်ရုံးအား ဆက်သွယ် မေးမြန်းရာ ဝန်ထမ်းအမျိုးသမီးတစ်ဦးက “ဒါနဲ့ ပတ်သက်လို့ လူကြီးတွေ ဆက်ပြီး လုပ်နေပါတယ်” ဟုသာဖြေဆိုသည်။
အဆိုပါ ဖြစ်ရပ်ဖြစ်ပွားပြီးနောက် ဗိုလ်မှူးဇေယျာလင်းကို ပုသိမ်တိုင်းရုံးသို့ ဆင့်ခေါ်သည်ဟု သတင်း ထွက်ပေါ်နေသော်လည်း အသေးစိတ်အတည်မပြုနိုင်သေးပေ။ထို့အပြင် ဗိုလ်မှူးဇေယျာလင်း၏ လုပ်ရပ်အပေါ် စစ်ကောင်စီဌာနဆိုင်ရာ ဝန်ထမ်းများက ပြစ်တင်ရှုတ်ချနေကြသည်။
ပြည်သူ့ကာကွယ်ရေးတပ်ဖွဲ့များရှိသော်လည်း တိုက်ပွဲမဖြစ်ဘဲငြိမ်သက်နေသည့် ဧရာဝတီတိုင်း၌ စစ်ကောင်စီ၏ ဌာနဆိုင်ရာဝန်ထမ်းများနှင့်အရာရှိများသည် စားသောက်ဆိုင်များ၊ KTVများ၌ ညစဉ် ဝိုင်းဖွဲ့စားသောက်နေကြသည်ဟုဒေသခံအချို့ကပြောသည်။
