ရှမ်းပြည်နယ် တောင်ပိုင်း၊ ညောင်ရွှေမြို့အဝင်မှာ ဖမ်းဆီးခံလိုက်ရတဲ့ ချိုးဖြူ မြို့ပြ ပျောက်ကြားတပ်ဖွဲ့ (JPRF)ရဲ့ ရဲဘော်တစ်ဦးဟာ ဒီနေ့ (ဒီဇင်ဘာ ၂၉)အထိ မိသားစုဝင်တွေနဲ့ အဆက်အသွယ် မရသေးဘူးလို့ တပ်ဖွဲ့ တာဝန်ရှိသူတွေက ပြောပါတယ်။
ဒီဇင်ဘာလ ၈ ရက်နေ့က ဖမ်းခံလိုက်ရတာ ဖြစ်ပြီး လက်ရှိမှာ တောင်ကြီးမြို့၊ ဗိုလ်ချုပ်အောင်ဆန်းလမ်း၊ အရှေ့ပိုင်းတိုင်း စစ်ဌာနချုပ် (ရပခ)ရဲ့ စစ်ကြောရေးစခန်းမှာ ချုပ်နှောင်ခံထားရတယ်လို့ ဆိုပါတယ်။
JPRF ပြန်ကြားရေး တာဝန်ရှိသူ တစ်ဦးက “သူအဖမ်းမခံရခင် အစောပိုင်းမှာ ကျနော်တို့ အဖွဲ့က တပ်သား တစ်ယောက် အလင်းဝင်သွားတယ်။ အဲဒါကြောင့်လည်း ဖြစ်နိုင်သလို တန်ဆိုင်တိုင်ပွဲ သူက မြို့တွေ အဝင်အထွက်များတော့ ရိပ်မိသွားတာလည်း ဖြစ်နိုင်တယ်။ အဆက်သွယ်တော့ မရသေးဘူး။ ကျနော်တို့အဖွဲ့က အစွမ်းကုန်ကြိုးစားပြီး လိုက်ပေးနေတယ်” လို့ ပြောပါတယ်။
ဖမ်းဆီးခံရသူဟာ JPRF ရဲ့ တာဝန်ခံ ကိုဂျိုကာ ဖြစ်ပြီး JPRF ရဲ့ လူမှုကွန်ယက် စာမျက်နှာ (Facebook Page) ကိုလည်း စီမံခန့်ခွဲနေသူလို့ သိရပါတယ်။
ဒါကြောင့် JPRF အနေနဲ့ လုံခြုံရေးအရ Page အသစ် ထပ်မံဖွင့်ထားရပြီး ကိုဂျိုကာနဲ့ အဆက်အသွယ်ရှိသူတွေ အားလုံး သတိဝိရိယနဲ့ သွားလာကြဖို့ ရွာငံ PDF ရဲ့ တပ်ဖွဲ့ဝင် တစ်ဦးက အခုလို သိပေးထားပါတယ်။
“သူ့မှာက Page ၂ ခုလုံး ပါသွားတော့ ကျန်တဲ့ ရဲဘော်တွေ အနေနဲ့ သူနဲ့ ပတ်သက်တဲ့ ဖုန်းနံပါတ်လေးတွေ၊ သူ့အကောင့်နဲ့ စကားပြောထားတာလေးတွေက စစ်ကြောရေးမှာ ပေါ်မှာပဲ ဆိုတော့ ဖုန်းအစိမ်းနဲ့ ခေါ်လာရင် သတိထား ကိုင်ကြဖို့ သိထားသွားလာကြဖို့ ပြောချင်တယ်”
ဓနုဒေသ ဖြစ်တဲ့ ရွာငံနဲ့ ပင်းတယမြို့နယ်တို့မှာ စစ်ရေးလှုပ်ရှားနေတဲ့ ကာကွယ်ရေးတပ်ဖွဲ့ အတွင်းက ရဲဘော်တချို့ဟာ ၂၀၂၃ ခုနှစ် နှစ်လယ်ပိုင်းကစပြီး လက်နက် ခဲယမ်း ရှားပါးခြင်း၊ စားနပ်ရိက္ခာ ခက်ခဲလာခြင်း၊ ဘဏ္ဍရေး အားနည်းခြင်း၊ ဒေသတွင်း ပျူစောထီးတွေ အားကောင်းလာတာနဲ့အတူ စစ်ရေးလှုပ်ရှားဖို့ ခက်ခဲလာခြင်း စတဲ့ အကြောင်းအရာတွေကြောင့် စစ်ကောင်စီထံ အလင်းဝင်သွားကြတယ်လို့ စုံစမ်း သိရပါတယ်။
