ပဲခူးတိုင်း၊ ဖြူးမြို့နယ် ၊ အောက်ကြာအင်းကျေးရွာကို စစ်တပ်က ဝင်ရောက် စီးနင်းပြီး PDF ဟု စွပ်စွဲကာ အမျိုးသား ၄ ဦးကို ရိုက်သတ်လိုက်ကြောင်း၊ ယင်းနောက် ရွာလုံးကျွတ် မီးတင်ရှို့နေကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဩဂုတ်လ ၈ ရက်နေ့နှင့် ယနေ့ ဩဂုတ်လ ၉ ရက်နေ့တို့တွင် အောက်ကြာအင်း ကျေးရွာအနီးတွင် တိုက်ပွဲများဖြစ်ပွား ကြောင်း၊ ယင်းနောက် စစ်တပ်က ယနေ့ နံနက်ပိုင်းတွင် အောက်ကြာအင်းကျေးရွာအတွင်းသို့ ဝင်ရောက်ကာ ရွာလုံး ကျွတ် မီးတင်ရှို့ နေခြင်း ဖြစ်ကြောင်း၊ PDF ဟုစွပ်စွဲကာ ဦးဇော်ဒေါင်း၊ ဦးသန်းစိုး၊ ဦးဝက်မှီး၊ ကိုနိုင်စိုးတို့ ကို ရိုက် သတ် သွားကြောင်း သိရှိရသည်။
“မနေ့ ဩဂုတ်လ ၈ ရက်နေ့ မနက် ၄ နာရီ ၅၀ လောက်မှာ လောက်မှာ တိုက်ပွဲ စဖြစ်တယ်။ ဒီနေ့ မနက်ကျတော့ ရွာထဲအထိ ဝင်လာပြီး ပစ်ခတ်တယ်။ PDF လို့ စွပ်စွဲပြီး ဦးဇော်ဒေါင်း၊ ဦးသန်းစိုး၊ ဦးဝက်မှီး၊ ကိုနိုင်စိုးတို့ကို ရိုက်သတ်သွားပါတယ်။ အခုရွာလုံးကျွတ် မီးတင် ရှို့နေတယ်။ ထွက်ပြေးရတာကတော့ ရွာလုံးကျွတ်ထွက်ပြေးနေရတာ” ဟု ကျေးရွာသား တစ်ဦးက ပြောဆိုသည်။
လက်ရှိတွင် တိုက်ပွဲဖြစ်ပွားနေသည့် အောက်ကြာအင်းကျေးရွာအနီးတွင် ဖုန်း လိုင်းနှင့် အင်တာနက်လိုင်းများကို စစ်တပ်က ဖြတ်တောက်ထားကြောင်း၊ စစ်ကောင်စီ တပ်များက ကျေးရွာများကို မီးတင်ရှို့သည့်အပြင် ကျေးရွာများ အတွင်းမှ အဖိုးတန် ပစ္စည်းများကိုလည်း လုယက်မှုများရှိနေကြောင်း သိရှိရ သည်။
