စစ်ကိုင်းတိုင်း၊ ဘုတလင်မြို့နယ်၊ ကုက္ကိုစုကျေးရွာအား ဝင်ရောက်ပြီး ပြန်ထွက်လာသည့် စစ်ကောင်စီတပ်စစ်ကြောင်းအား တိုက်ခိုက်ခဲ့ကြောင်း Freedom Revolution Force(FRF)ဘုတလင်တပ်ခွဲမှ တပ်ခွဲမှူးက ပြောသည်။
ယနေ့(ဇန်နဝါရီ၂၄ ရက်) နံနက် ၉နာရီကျော်က ဘုတလင်မြို့နယ်၊ ကုက္ကိုစုကျေးရွာအား စစ်ကြောင်းထိုး ပြန်ထွက်လာသော အင်အား၅၀ခန့်ပါ စစ်ကောင်စီတပ်အား မြို့အဝင်အနီးတွင် ကြိုတင်ကင်းပုန်းဝပ်ထားသော နေရာသို့ ရောက်ချိန် စောင့်ဆိုင်းပစ်ခတ်တိုက်ခိုက်ခဲ့ကြောင်း တပ်ခွဲမှူးက ပြောသည်။
အပြန်အလှန်ပစ်ခတ်မှု ၁၅မိနစ်ခန့်ဖြစ်ပွားပြီး စစ်ကောင်စီတပ် ထိခိုက်မှုရှိကြောင်း FRF အဖွဲ့က ဆိုသည်။
“ကျွန်တော်တို့က သူတို့လာမယ့်လမ်းကို ကြိုတင် ကင်းပုန်းဝပ်ထားတာ။ ခေါင်းထိကောင်ကတော့ မသေချာဘူးတဲ့။ လက်မောင်းထိတဲ့ကောင်နဲ့ ခြေထောက်မှန်တဲ့ကောင်ကတော့ ရှင်နိုင်ခြေရှိတယ်တဲ့။ထိခိုက်တဲ့သူတွေကို ဖြစ်တဲ့နေရာထိကားထိုးပြီး တင်သွားတယ်”ဟု တပ်ခွဲမှူးက ပြောသည်။
အဆိုပါ စစ်ကြောင်းတွင် ဖမ်းဆီးခံထားရသော ဓားစာခံပြည်သူအချို့လည်းပါဝင်ပြီး ဘုတလင်မြို့ပေါ် ပြည်သူ့ဝန်ဆောင်မှု OSS ရုံးသို့ ပြန်လည်ဆုတ်ခွာသွားကြောင်း သိရသည်။
သို့သော် စစ်ကြောင်းထိုးခံရသည့် ကုက္ကိုစုကျေးရွာ၏ အခြေအနေကိုမူ မသိရသေးပေ။
ဘုတလင်မြို့ရှိ စစ်ကောင်စီတပ်ဖွဲ့တွင် ဗျူဟာမှူးအပြောင်းအလဲလုပ်ပြီးနောက် ယခင်ကဲ့သို့ စစ်ကြောင်းရှည်မထွက်တော့ဘဲ မြို့အနီးဝန်းကျင်သာ နေ့ချင်းပြန်စစ်ကြောင်းထိုးနေကြောင်း ဒေသတွင်းတော်လှန်ရေးအင်အားစုများက ပြောသည်။
ဇန်နဝါရီ ၁၂ရက်ကလည်း ဘုတလင်မြို့နယ်၊ ကြက်ရိုးကုန်းကျေးရွာ ဝင်ရောက်မီးရှို့ဖျက်ဆီးခဲ့သည့် စစ်ကောင်စီတပ်စစ်ကြောင်းကို FRF အဖွဲ့နှင့် ဒေသတွင်းတော်လှန်ရေးအင်အားစုများက သွားရောက်တိုက်ခိုက်ရာ ထိခိုက်သေဆုံးမှုများ ရှိခဲ့သည်။
