ဂျန်နဝါရီ ၈ ရက်နိ၊ ညဇာ ၈ နာရီကျော်လောက်က ဘူးသီးတောင်မြို့နယ်မာ ARSA အကြမ်းဖက်အုပ်စုက နီအိမ်တဆောင်သို့ဝင်ရောက်ပြီးကေ သီနတ်နန့် ပစ်သတ်ခလို့ မူဆလင် ၃ယောက်သီဆုံးလားပနာ၊အရာ ၃ ယောက်လည်း ဒဏ်ရာပြင်းပြင်းထန်ထန် ရဟိလားကြောင်း သိရပါရေ။
သီဆုံးလားခရေလူတိစွာ ဘူးသီးတောင်မြို့နယ်၊ တပ်မချောင်းအုပ်စု၊ တပ်မချောင်းအနောက် (မူဆလင်)ရွာက မာမောက်ဂျူဘိုင် (၁၅နှစ်)၊ အာမီနိုရ်လု(၁၈ နှစ်)၊ အာမီရာကိန်း(၃၀ နှစ်)ရို့ဖြစ်ပြီးကေ၊ ဒဏ်ရာရလား လူတိက တော့ နိုရ်ဟာကိန်း(၂၃ နှစ်)၊ဆာလာမာခမ်း(၄၀နှစ်)နန့်အာဘူကာလောင်(၅၂ နှစ်) ရို့ဖြစ်ပါရေ။
ဂျန်နဝါရီ ၈ ရက်နိ၊ညဇာ ၈ နာရီ ၁၅မိနစ်လောက်မာ မျက် နှာဖုံးစွပ်ထားရေ ARSA အကြမ်းဖက်အဖွဲ့ဝင် ၅ ယောက်စွာ လက်နက်အပြည့်အစုံနန့် တပ်မချောင်းအနောက် (မူဆလင်)ရွာသို့ ဝင်ရောက်လာပြီးကေ ယင်း ၆ ယောက်ကို ပစ်သတ်ခစွာလို့ ရွာသားတိက ပြောပါရေ။
ယင်းပိုင်အကြမ်းဖက် ပစ်ခတ်သတ်ဖြတ်ခလို့ မာမောက်ဂျူဘိုင်၊ အာမီနိုရ်လု နန့် အာမီရာကိန်းရို့စွာ နီရာမာပင် ဂွင်တိုင်းသီဆုံးလားခရေလို့ ရွာသားတိက ဆိုပါရေ။
ယင်းအပြင် အာဘူကာ၊နိုရ်ဟာကိန်းနန့် ဆာလာမာခမ်းရို့လည်း အသီးသီးဒဏ်ရာရလားပြီးကေ ဘူးသီးတောင်ဆီးရုံကြီးမာ အရေးပေါ်ဆီးကုသမှုခံယူနီကတ်ရရေလို့ သိရပါရေ။
ARSA အကြမ်းဖက်အုပ်စုစွာ ဘင်္ဂလားဒေ့ချ်နိုင်ငံ၊ ကော့ဘဇားခရိုင်ကမူဆလင်လူငယ်တိကိုစည်းရုံးပနာ အကြမ်း ဖက်လုပ်ရပ်တိ လုပ်ကိုင်နီစွာဖြစ်ပြီးကေ၊ဘူးသီးတောင် နန့် မောင်တောမြို့နယ်အတွင်းက ၎င်းရို့ကို မထောက်ခံရေ မူဆလင်လူငယ်တိကို အဂုပိုင် ဖမ်းဆီးသတ်ဖြတ်လိဟိကြောင်း ဒေသခံတိပြောဆိုချက်အရ သိဟိရပါရေ။
