မန်တုံမြို့နယ်တွင် တိုက်ပွဲများ ဆက်လက် ဖြစ်ပွားနေပြီး စစ်တပ်က ကျေးရွာများကို လက်နက်ကြီး၊ လေကြောင်း တို့ဖြင့် ပစ်ခတ် တိုက်ခိုက် မူဆယ်နှင့် ကွတ်ခိုင်မြို့တို့တွင် စစ်တပ်က လူအင်အားနှင့် ရိက္ခာများ ဖြည့်တင်းနေ

ရှမ်းပြည်နယ်၊ မန်တုံမြို့နယ်တွင် အကြမ်းဖက် စစ်တပ်နှင့် TNLA တို့ တိုက်ပွဲများ ဆက်လက် ဖြစ်ပွားနေပြီး စစ်တပ်က ကျေးရွာများကို လက်နက်ကြီး၊ လေကြောင်း တို့ဖြင့် ပစ်ခတ် တိုက်ခိုက်နေကြောင်း PSLF/TNLA သတင်းနှင့်ပြန်ကြားရေးဌာန ထံမှ သိရသည်။

ဒီဇင်ဘာလ ၁၉ ရက်နေ့ နံနက် ၆ နာရီခန့်တွင် မန်တုံမြို့ရှိ အကြမ်းဖက် စစ်တပ်၏ ခလရ-၁၃၀ တပ်စခန်းတွင် အကြမ်းဖက် စစ်တပ်နှင့် တအာင်းတပ်မတော် PSLF/TNLA တို့ တိုက်ပွဲဖြစ်ပွားခဲ့ကြောင်း သိရသည်။

အကြမ်းဖက် စစ်တပ်၏ မန်တုံမြို့ ခလရ-၁၃၀ တပ်စခန်းက လွယ်ကန်ကျေးရွာ၊ နမ့်ဆန်မြို့လမ်းခွဲ ၊ ဒုက္ခသည်စခန်းနှင့် ပန်နင်ကျေးရွာလမ်းခွဲတို့ကို လက်နက်ကြီးဖြင့် အကြိမ် ၇၀ ပစ်ခတ် တိုက်ခိုက်ခဲ့ကြောင်း၊ မိုးကုတ်မြို့နယ်ရှိ အကြမ်းဖက် စစ်တပ်မှလည်း အထက်ပိန်ပြစ်ကျေးရွာကို လက်နက်ကြီးဖြင့် ၁ ကြိမ်၊ စလောင်းတောင်ကို ၂ ကြိမ် ပစ်ခတ် တိုက်ခိုက်ခဲ့ကြောင်း သိရှိရသည်။

မန်တုံမြို့ အနီးတဝိုက်ကိုလည်း အကြမ်းဖက် စစ်တပ်က Jet Fighter ဖြင့် ၅ ကြိမ်၊ Mi35 ဖြင့် ၈ ကြိမ်၊ Y12 လေယာဥ်ဖြင့် ၃၄ ကြိမ် လာရောက် ပစ်ခတ်တိုက်ခိုက်ခဲ့ကြောင်း သိရသည်။

ထို့ပြင် မူဆယ်မြို့ရှိ စစ်ကောင်စီတပ်စခန်းကို အကြမ်းဖက် စစ်တပ်က စစ်ကူလူအင်အားနှင့် ရိက္ခာများ ၂ ကြိမ် ထပ်မံလာရောက် ပို့ချခဲ့ကြောင်း၊ အလားတူ ကွတ်ခိုင်မြို့ရှိ စစ်ကောင်စီတပ်စခန်းကိုလည်း စစ်ကူလူအင်အားနှင့် ရိက္ခာများ ၁ ကြိမ် လာရောက်ပို့ဆောင်ခဲ့ကြောင်း သိရှိရသည်။