မုန်းမြို့ကို စစ်ကောင်စီတပ်က ပြန်ထိန်းချုပ်ထားသဖြင့် မြို့ခံပြည်သူများနေရပ် မပြန်ရဲ

ပဲခူးတိုင်း၊ ကျောက်ကြီးမြို့နယ်၊ မုန်းမြို့ကို စစ်ကောင်စီတပ်တွေ ပြန်လည်ထိန်းချုပ်ထားတာကြောင့် မြို့ခံပြည်သူတွေဟာ နေရပ် မပြန်ရဲသေးဘဲ ဖြစ်နေပါတယ်။

ဒီဇင်ဘာ ၂ ရက် ည ၁၂ နာရီလောက်က စတင်ဖြစ်ပွားခဲ့တဲ့ မုန်းမြို့တွင်း မြို့ပြင် တိုက်ပွဲတွေကြောင့် မြို့ပေါ်ရပ်ကွက် ၆ ရပ်ကွက်အပါအဝင် ကျေးရွာပေါင်း ၉၅ ရွာက အရပ်သားပြည်သူ ၇၀,၀၀၀ လောက် အခုအချိန်အထိ ဘေးလွတ်ရာ ထွက်ပြေးတိမ်းရှောင်နေရပါတယ်။

ဒါ့အပြင် ဒီဇင်ဘာ ၈ ရက်ကစတင်ပြီး စစ်ကောင်စီက လေကြောင်းကနေ စစ်ကူ ပို့ဆောင်ပေးခဲ့တာကြောင့် မုန်းမြို့တွင်း မြို့ပြင်မှာ ပြန်လည်တပ်စွဲနေပါတယ်။

မုန်းမြို့တွင်းမှာ စစ်ကောင်စီတပ်တွေ ပြန်လည်တပ်စွဲနေတာကြောင့် KNLA ပူးပေါင်းတပ်ဖွဲ့တွေနဲ့ တိုက်ပွဲ ပြန်လည် ဖြစ်ပွားမှာကို စိုးရိမ်တယ်လို့ စစ်ရှောင်ပြည်သူတွေက ပြောပါတယ်။

တိုက်ပွဲနဲ့ စစ်ကောင်စီရဲ့ မြေပြင်နဲ့ လေကြောင်းတိုက်ခိုက်မှုတွေကြောင့် အရပ်သားပြည်သူတွေ ထိမှန်သေဆုံးခဲ့တဲ့အပြင် ဘုန်းကြီးကျောင်း၊ ပြည်သူပိုင် အဆောက်အဦတွေနဲ့ နေအိမ်တွေ ထိမှန်ပျက်စီးခဲ့ပါတယ်။

ဒါ့အပြင် စစ်ကောင်စီတပ်တွေက လက်ရှိမှာ မြို့ပေါ်နဲ့ အနီးအနား ကျေးရွာတချို့မှာ ပြန်လည်တပ်စွဲနေတာကြောင့် အရပ်သားပြည်သူ ထိမှန်သေဆုံးခဲ့တဲ့ အရေအတွက်ကို အတည်မပြုနိုင်သေးဘူးလို့ KNU က ထုတ်ပြန်ပါတယ်။

တိုက်ပွဲတွေ ပြန်လည်ငြိမ်သက်ချိန် မြို့တွင်းကို ပြန်လည်ဝင်ရောက်သွားတဲ့ ဒေသခံပြည်သူတွေ ပိတ်မိနေတယ်လို့ စစ်ရှောင်ပြည်သူတစ်ယောက်က ပြောပါတယ်။

မုန်းမြို့တွင်းနဲ့ မြို့ပြင် တပ်စခန်းသိမ်းတိုက်ပွဲတွေအတွင်း စစ်ကောင်စီတပ်ဘက်က ၁၂၀ ယောက် သေဆုံးပြီး ၅၀ ယောက် ဒဏ်ရာရရှိခဲ့တဲ့အပြင် ဒုတပ်ရင်းမှူးအပါအဝင် တပ်မိသားစုဝင်တွေပါ အရှင်ဖမ်းဆီးရမိခဲ့ပါတယ်။

KNLA ပူးပေါင်းတပ်ဖွဲ့ဘက်ကလည်း သေဆုံးသူနဲ့ ဒဏ်ရာရရှိသူတွေ ရှိခဲ့တယ်လို့ KNU က ထုတ်ပြန်ခဲ့ပေမဲ့ နှစ်ဘက်တိုက်ပွဲ အတွင်း စစ်ကောင်စီတပ်ဘက်က ထိခိုက်သေဆုံးမှုကို သီးခြားအတည်မပြုနိုင်သေးပါဘူး။