စစ်ကိုင်းတိုင်း၊ မုံရွာမြို့နယ်ရှိ လင်းပိုးကျေးရွာတွင် စစ်ကောင်စီတပ်က ကျပ်သိန်းတစ်ရာကျော်တန်ဖိုးရှိ ဒေသခံပြည်သူများ၏ ပစ္စည်းများကို သိမ်းယူသွားပြီး ခြိမ်းခြောက်စာများပါ ရေးသားသွားကြောင်း ဒေသတွင်းသတင်းရင်းမြစ်များက ပြောသည်။
ယနေ့ (ဇူလိုင်လ ၂ ရက်) နေ့လယ် ၁၂ နာရီက လင်းပိုးကျေးရွာကို အင်အား ၆၀ခန့်ပါ စစ်ကောင်စီတပ်က ခြေလျင်စစ်ကြောင်းထိုး ဝင်ရောက်ခဲ့သည်။
မုံရွာ – အမြင့်လမ်းပေါ်ဖြတ်သန်းလာသော FAW ကားကြီးနှစ်စီး ချောဆွဲပြီး လင်းပိုးကျေးရွာစျေးဆိုင်များမှ ကာလတန်ဖိုး သိန်း၆၀ ခန့်ရှိသည့် ဓာတ်ဆီပေပါ (၁၂)လုံး၊ စားသုံးဆီပုံးများ၊ TV တစ်လုံး၊ ဘတ္ထရီအိုးကြီးတစ်လုံး၊ ဖိနပ်များ၊ Aircoolerတစ်လုံးနှင့် စျေးဆိုင်များရှိမုန့်၊အအေးဗူး၊ ဘီယာဗူးများ၊ ကျောင်းသားသုံးကျောပိုးအိတ်ပါမကျန် စုစုပေါင်း ကာလတန်ဖိုး ကျပ်သိန်း တစ်ရာကျော်ဖိုး ပစ္စည်းများ လုယူသွားကြောင်း မုံရွာ-အမြင့်လမ်းသတင်းမှန်ပြန်ကြားရေးအဖွဲ့က ပြောသည်။
“သူတို့ရိက္ခာအသုံးတွေ ပြတ်လို့နေမှာပေါ့။ အဲလိုပဲ ထင်တယ်။ ဆီဆိုင်တွေက ဆီတွေလည်းယူသွားတယ်။ ငါးရွာလောက် ရှောင်ရတယ်။”ဟု မုံရွာ – အမြင့်လမ်းသတင်းမှန်ပြန်ကြားရေးအဖွဲ့ဝင် ကိုစွမ်းလင်းထက်က ပြောသည်။
အဆိုပါ စစ်ကောင်စီတပ်သည် လင်းပိုးကျေးရွာရှိ လက်ဖက်ရည်ဆိုင်တစ်ဆိုင်တွင် ခြိမ်းခြောက်စာများ၊ ပြည်သူနှင့် တော်လှန်ရေးရဲဘော်များအကြား သွေးကွဲစေသောစာများရေးသားထားခဲ့ကြောင်း၊ ထို့နောက် ညနေ ၄နာရီခန့်တွင် မအူဂိတ်အတွင်းသို့ ပြန်လည်ဝင်ရောက်သွားသည်ဟု ဆိုသည်။
စစ်ကောင်စီတပ်သည် ပြီးခဲ့သည့် ဇွန်လအတွင်းကလည်း ညောင်ပင်သာ – လင်းပိုး – လင်းပင်ဝ ကျေးရွာများကို ၂ ကြိမ်ထက်မနည်းဝင်ရောက်ပြီး လက်ဖက်ရည်ဆိုင်များ မီးရှို့ဖျက်ဆီးခြင်း၊ မုံရွာ-အမြင့်လမ်းအား ဘူဒိုဇာများဖြင့် ဖျက်ဆီးခြင်းများ ပြုလုပ်ခဲ့သေးသည်။
