မူးမြို့နယ်ရှိ ရေတွင်းကုန်းကြီးရွာများကို စစ်တပ်က စစ်ကြောင်းထိုး ဝင်ရောက်ပြီး ပြည်သူ ၁ ဦးကို သတ်ဖြတ် မြေမြုပ်ကာ နေအိမ် ၇၆ လုံးကို မွှေနှောက် ဖျက်ဆီး၊စစ်တပ်က လက်နက်ကြီးဖြင့် ပစ်ခတ်မှု ပြည်သူ ၅ ဦးထိခိုက်ဒဏ်ရာရပြီး ပြည်သူ ၃၀၀၀ ကျော် ထွက်ပြေးတိမ်းရှောင်နေရ

KNU မူးမြို့နယ်ရှိ ရေတွင်းကုန်းကြီးရွာကို စစ်တပ်က စစ်ကြောင်းထိုး ဝင်ရောက်ပြီး ပြည်သူ ၁ ဦးကို သတ်ဖြတ် မြေမြုပ်ကာ နေအိမ် ၇၆ လုံးကို မွှေနှောက် ဖျက်ဆီးခဲ့ကြောင်း ကေအဲန်ယူ−ဗဟိုက ထုတ်ပြန်ထားသည်။

ဇူလိုင်လ ၂ ရက်နေ့ မှစ၍ အကြမ်းဖက် စစ်တပ်က KNU မူးမြို့နယ်ရှိ ရေတွင်းကုန်းကြီး ကျေးရွာအတွင်းကို လက်နက်ကြီးများ ပစ်ခတ်ကာ ဝင်ရောက်လာခဲ့ကြောင်း၊ ဇူလိုင်လ ၁၁ ရက်နေ့တွင် အကြမ်းဖက် စစ်တပ်က ရေတွင်းကုန်းကြီး ကျေးရွာမှ ပြန်လည် ထွက်ခွာသွားခဲ့ကြောင်းသိရသည်။

အကြမ်းဖက် စစ်တပ် စစ်ကြောင်း ထွက်ခွာသွားပြီးနောက် ဇူလိုင်လ ၁၂ ရက်နေ့တွင် ကရင်အမျိုးသားလွတ်မြောက်ရေး တပ်မတော် K.N.L.A ၊ တပ်ရင်း ၈ နှင့် လက်အောက်ခံ ပူးပေါင်းတပ်ဖွဲ့များက ကျေးရွာအတွင်းကို ဝင်ရောက် ရှင်းလင်းခဲ့ရာ အကြမ်းဖက် စစ်တပ်က ၁၀ ရက်တာအတွင်း ကျေးရွာအတွင်းရှိ ပြည်သူများ၏ နေအိမ် ၇၆ လုံးကို မွှေနှောက်ဖျက်ဆီးပြီး ပစ္စည်းဥစ္စာများကို ခိုးယူသွားကာ နေအိမ် ၁ လုံးကို မီးရှို့ ဖျက်ဆီးခဲ့ကာ ကျေးရွာအတွင်းရှိ စိတ်ရောဂါခံစားနေရသူ အသက် ၅၈ နှစ်အရွယ် ဦးအောင်ဇော်ဌေးကို အကြမ်းဖက် စစ်တပ်က သတ်ဖြတ် မြေမြုပ်ခဲ့ကြောင်း သိရှိရသည်။

ဇူလိုင်လ ၁၃ ရက်နေ့တွင် အကြမ်းဖက် စစ်တပ်က ဂမုန်းကျော်မှနေ၍ KNU-မူးမြို့နယ် စီမံအုပ်ချုပ်မှုနယ်မြေအတွင်းရှိ ကျေးရွာများကို လက်နက်ကြီးများဖြင့် ပစ်ခတ်ခဲ့သောကြောင့် ဘန်းလောင်ကျေးရွာမှ ပြည်သူ ၄ ဦးနှင့် ကျောက်စောင်းကျေးရွာမှ ပြည်သူ ၁ ဦး ထိခိုက် ဒဏ်ရာရရှိခဲ့ကြောင်း သိရသည်။

ဇဟာရွာကျေးရွာ၊ ရေတွင်းကုန်းလေးကျေးရွာ၊ ကျီးရိုးကျေးရွာ စသည့်ကျေးရွာများမှ ပြည်သူ ၃၃၃၅ ဦးသည် ဘေးလွတ်ရာသို့ ထွက်ပြေးတိမ်းရှောင်နေရကြောင်း KNU ဗဟိုက ထုတ်ပြန်ထားသည်။