မောင်တော ရန်အောင်ပြင် စခန်းကို သိမ်းပိုက်ရရှိကြောင်း AA ကြေညာ၊ လက်နက်ချ အညံ့ မခံသည့် စစ်စခန်းများကို ထိုးစစ်ဆင် တိုက်ခိုက်နေ

ရခိုင်ပြည်၊ မောင်တောမြို့၊ ရန်အောင်ပြင် ကင်းစခန်းအား ဖေဖော်ဝါရီလ ၂၃ ရက်နေ့တွင် တိုက်ခိုက် သိမ်းပိုက် ရရှိခဲ့ပြီး လက်နက်ချ အညံ့မခံသည့် စစ်ကောင်စီ စစ်စခန်းများကို ဆက်လက် ထိုးစစ်ဆင် တိုက်ခိုက်နေကြောင်း ရက္ခိုင့်တပ်တော် AA က သတင်းထုတ်ပြန်သည်။

ရန်အောင်ပြင် ကင်းစခန်းအား ဖေဖော်ဝါရီလ ၂၃ ရက်နေ့တွင် နံနက် ၇ နာရီ ၃၂ မိနစ်မှ စတင်ကာ ထိုးစစ်ဆင်တိုက်ခိုက်ခဲ့ပြီး နေ့လယ် ၁၂ နာရီ ၁၅ မိနစ် တိုက်ခိုက်မှု ၅ နာရီအကြာတွင် ၎င်းစခန်းအား အပြီးသတ် သိမ်းပိုက်ရရှိခဲ့ကြောင်း သိရသည်။

ထို့အပြင် ၎င်း ပတ်ဝန်းကျင်ရှိ လက်ကျန်စခန်းများကိုလည်း ဆက်လက်ထိုးစစ်ဆင် တိုက်ခိုက်သိမ်းပိုက်သွားမည်ဖြစ်ကြောင်း AA က ဆိုသည်။

အလားတူ ပုဏ္ဏားကျွန်း၊ ရသေ့တောင်၊ ဘူးသီးတောင်၊ မောင်တော၊ မင်းပြား မြို့များ၌ ရှိသော လက်နက်ချအညံ့မခံသည့် စစ်ကောင်စီ၏ စစ်စခန်းများကို AA က ထိုးစစ်ဆင် တိုက်ခိုက်လျက်ရှိကြောင်း ဒေသခံများက ပြောသည်။

မင်းပြားမြို့မှ တစ်ခုတည်းသော စစ်ကောင်စီ၏ လက်ကျန်စခန်းဖြစ်သည့် ကမ်းနီနှင့် မေလွမ်းကျေးရွာအနီးရှိ အမှတ် ၉ တိုင်းဗဟိုလေ့ကျင့်ရေး သင်တန်းကျောင်းကို AA မှ ၆ ရက်မြောက် ထိုးစစ်ဆင် တိုက်ခိုက်နေကြောင်း သိရသည်။

ဖေဖော်ဝါရီ ၂၂ ရက်နေ့က ပုဏ္ဏားကျွန်း မြို့မရဲစခန်းကိ AA က တိုက်ခိုက်ပိုက်ရရှိခဲ့ပြီး ပုဏ္ဏားကျွန်းမြို့မှ ခမရ ၅၅၀ ကိုလည်း ရက္ခိုင့်တပ်တော်မှ ထိုးစစ်ဆင်တိုက်ခိုက်လျက်ရှိကြောင်းနှင့် ရမ်းဗြဲမြို့ကိုလည်း စစ်ကောင်စီက လေကြောင်းမှ ဗုံးကြဲတိုက်ခိုက်ခြင်းများကို လုပ်ဆောင်လျက် ရှိနေကြောင်း AA က သတင်းထုတ်ပြန်သည်။