မြဝတီ – ကော့ကရိတ် အာရှလမ်းပိုင်းအချို့ ရေကြီး

ကရင်ပြည်နယ်၊ မြဝတီမြို့တွင် သုံးရက်ဆက်မိုးကောင်းပြီးနောက် အာရှလမ်းမကြီးလမ်းပိုင်းအချို့နှင့် ပတ်ဝန်းကျင်ကျေးရွာအချို့ ရေကြီးနေသည်။

မြဝတီမြို့နယ်အတွင်း ဇွန်လ ၇ရက်မှစ၍ မိုးများပြီး ယမန်နေ့(ဇွန်လ ၈ရက်)ညက ကားလမ်းပေါ်အထိ ရေလျှံနေခြင်းဟု ဒေသခံများက ပြောသည်။

“အာရှလမ်းမကြီးဘေးက မြေနီးကုန်းနဲ့ ကျွန်းတောမှာ အဆိုးဆုံးပဲ။ မိုးက ရပ်နေပေမယ့် ရေက တိုးနေဆဲပဲ။ တောင်ပေါ်မှာ ရွာနေသေးတယ်”ဟု ဒေသခံတစ်ဦးက ပြောသည်။

ထိုင်းနိုင်ငံကို ဆက်သွယ်ထားသည့် ကော့ကရိတ်-မြဝတီအာရှလမ်းသည် ဒေါနတောင်ကို ဖြတ်၍ ဖောက်ထားသည်။ တောင်ပေါ်၌ပုံမှန်ထက်မိုးများပါက လမ်း‌ရေလျှံပြီး လမ်းပိုင်းများ ပျက်စီးလေ့ရှိသည်။ ယမန်နှစ်မိုးရာသီကလည်း အာရှလမ်းပိုင်းနေရာအချို့ ပြတ်တောက်ခဲ့ဖူးသည်။

အမျိုးသားညီညွတ်ရေးအစိုးရ၊ လူသားချင်းစာနာထောက်ထားရေးနှင့် ဘေးအန္တရာယ်ဆိုင်ရာစီမံခန့်ခွဲရေး၀န်ကြီးဌာန (MOHADM)က ဇွန်လ ၃ရက်မှ ဇွန်လ ၉ရက်အထိ ရာသီဥတုသတိပေး ချက်၌ ဧရာဝတီတိုင်း၊ရန်ကုန်တိုင်း၊ပဲခူးတိုင်း၊မွန်ပြည်နယ်၊ကရင်ပြည်နယ်၊ တနင်္သာရီတိုင်းတို့၌ မိုးကြီးမည်ဟု သတိပေးထားသည်။

အဆိုပါကာလအတွင်း မုတ်သုံလေအားကောင်းနေ၍ မိုးသည်းထန်စွာရွာနိုင်ပြီး အထူးသဖြင့် မွန်ပြည်နယ်၊ကရင်ပြည်နယ်၊တနင်္သာရီတိုင်းတို့၌ မိုးပိုကြီးနိုင်ပြီး ရေကြီး၊ ရေလျှံမှုနှင့်မြေပြိုဘေးသတိပေးထားသည်။

ယခုရက်ပိုင်း၌ ရှမ်းပြည်နယ်အရှေ့ပိုင်းဒေသများတွင်လည်း မိုးကောင်းနေသည်။ မိုးကြောင့် ဒေသတွင်းလမ်းပိုင်းအချို့ ပျက်စီးပြီးလမ်းပိတ်ဆို့နေသည်။

ပြီးခဲ့သည့် မေလနောက်ဆုံးပတ်က အိန္ဒိယနှင့်ဘင်္ဂလားဒေ့ရှ်နိုင်ငံသို့ဝင်ရောက်ခဲ့သည့် Remal ဆိုင်ကလုံးမုန်တိုင်းအရှိန်ကြောင့် မြန်မာနိုင်ငံဒေသအများစုမိုးကောင်းခဲ့သည်။

ထို့အပြင် ကချင်ပြည်နယ် မြစ်ကြီးနားမြို့၊ ချီဖွေမြို့တို့တွင် ရေကြီးနစ်မြုပ်မှုဖြစ်ခဲ့ပြီး ချီ‌‌ဖွေမြို့တွင် ရေဘေးကြောင့် လူတစ်ဦးသေဆုံးခဲ့သည်။