ကချင်ပြည်နယ်၊ ရွှေကူမြို့နယ်၊ မြို့လှမြို့အတွင်းက စစ်ကောင်စီရဲ့ ဗျူဟာစခန်းကုန်းတစ်ခုကို ကချင်အမျိုးသားလွတ်လွပ်ရေးတပ်မတော် (KIA) နဲ့ KPDF တို့က ပြန်လည်ထိန်းချုပ်လိုက်ပြီလို့ ဒီနေ့မှာ ထုတ်ပြန်ကြေညာပါတယ်။
အဲ့ဒီ့ဗျူဟာစခန်းကုန်းဟာ ၂၀၀၂ ခုနှစ်ကတည်းက တပ်မ (၈၈) လက်အောက်ခံ ခမရ-၃၇၈ ဗျူဟာမှူးကိုယ်တိုင် ဦးစီးကွပ်ကဲတဲ့ စခန်းဖြစ်ပါတယ်။
စစ်ကောင်စီတပ်ဟာ အဲ့ဒီစခန်းကို ဖေဖော်ဝါရီ ၂၂ ရက်နေ့မှာ စွန့်ခွာသွားပြီးနောက် KIA နဲ့ KPDF တို့က ပြန်လည်ထိန်းချုပ်လိုက်တာဖြစ်ပါတယ်။
KIA နဲ့ KPDF တို့ဟာ တပ်မ (၈၈) လက်အောက်ခံတပ်တွေကို တိုက်ခိုက်နေပြီး ပြီးခဲ့တဲ့ ဒီဇင်ဘာ ၁ ရက်နေ့ကလည်း ခလရ-၁၀ အထိုင်တပ်စခန်းကို ပူးပေါင်းတိုက်ခိုက်ခဲ့ရာမှာ စစ်ကောင်စီတပ်က စခန်းကို စွန့်ခွာထွက်ပြေးသွားခဲ့ပါတယ်။
အဲ့ဒီစခန်းသိမ်းပွဲမှာ သေနတ် ၈ လက်နဲ့ စစ်သုံ့ပန်း ၁ ဦးကို ဖမ်းဆီးသိမ်းမိခဲ့ပြီး ဖမ်းမိတဲ့ စစ်သုံ့ပန်းကိုတော့ ဆေးဝါးစောင့်ရှောက်မှုပေးကာ ပြန်လွှတ်ပေးခဲ့တယ်လို့ ထုတ်ပြန်ထားပါတယ်။
