မြေလတ်ဒေသဖြစ်တဲ့ စစ်ကိုင်း၊ မကွေး၊ ပဲခူးတိုင်းအတွင်းရှိ အကျဥ်းထောင်တွေက လွတ်ငြိမ်းခွင့်နဲ့ ပြန်လွတ်လာသူတွေ အထဲမှာ နိုင်ငံရေးအကျဥ်းသား ၁၃ ဦးသာပါဝင်တယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများကွန်ရက်ထံက သိရပါတယ်။
လွတ်လာတဲ့နိုင်/ကျဥ်း ၁၃ ဦးမှာ မုံရွာထောင်မှ ၅ ဦး၊ သာယာဝတီထောင်မှ ၇ ဦး၊ ပြည်အကျဉ်းထောင်မှ ၁ ဦးတို့ ဖြစ်ကြပြီး ပေါင်းတည်ထောင်၊ ကလေးအကျဉ်းထောင်၊ ဂန့်ဂေါ်အချုပ်ထောင်၊ ကသာအကျဉ်းထောင်၊ သရက်အကျဉ်းထောင်၊ ဒိုက်ဦးထောင်၊ ပခုက္ကူထောင်၊ မကွေးထောင်၊ ရွှေဘိုထောင်တွေက လွတ်မြောက်လာသူတွေထဲမှာ နိုင်/ကျဥ်း မပါဝင်ခဲ့ဘူးလို့ ဆိုပါတယ်။
“စကစရဲ့ ရှုံးနိမ့်နေတဲ့ စစ်ပွဲတွေကြောင့်မို့ အရင်လို နိုင်/ကျဥ်းတွေကို အရေအတွက် အလုံးအရင်းနဲ့ လွှတ်ပေးဖို့ မဖြစ်နိုင်တာလို့ မြင်တယ်”လို့ မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများကွန်ရက်မှ ဦးဆောင်ကော်မတီဝင် ကိုသိုက်ထွန်းဦးက ပြောပါတယ်။
ပဲခူးတိုင်းမှ ရာဇဝတ်မှုအပါအဝင် အခြားအမှုတွေနဲ့ကျခံနေရသူ ပြည်ထောင်က အကျဉ်းသား ၁၀၀ ကျော်၊ သာယာဝတီထောင်က ၁၅၀ ဦး ၊ ပေါင်းတည်ထောင်က ၈၁ ဦး ၊ တောင်ငူထောင်က ၁၄၅ နဲ့ ဒိုက်ဦး (ကျိုက်ဇကော) အကျဉ်းထောင်က စုစုပေါင်း ၅၀၀ ဝန်းကျင် လွတ်မြောက်ခဲ့ရာမှာ နိုင်/ကျဉ်း ၈ ဦးသာ ပါဝင်တာဖြစ်ပါတယ်။
“နိုင်/ကျဉ်း လွတ်မြောက်မှုက အစွန်းထွက်တောင် မရှိပါဘူး။ သေးသေးမွှားမွှားတွေပဲ လွတ်တာ ဟန်ပြပါ၊ ၆ လအောက် ကျန်တာတွေကို လွှတ်တာ။ တချို့ထောင်တွေဆို နိုင်/ကျဥ်းတယောက်မှ မလွတ်ဘူး” လို့ ပဲခူးတိုင်း အကျဉ်းဦးစီးဌာနနဲ့ နီးစပ်သူတဦးက မြေလတ်အသံကို ပြောပါတယ်။
ဇန်နဝါရီ ၄ ရက်က ကျရောက်တဲ့ ၇၆ နှစ်မြောက် လွတ်လပ်ရေးနေ့မှာ နိုင်ငံတဝှမ်း အကျဉ်းထောင်တွေက နိုင်ငံရေးနဲ့ အကျဉ်းကျနေတဲ့သူ (နိုင်/ကျဉ်း) ၉,၆၀၀ကျော် လွှတ်ပေးခဲ့တယ်လို့ စစ်ကောင်စီက ကြေညာချက် ထုတ်ပြန်ခဲ့ပါတယ်။
ဒါပေမဲ့ စစ်ကောင်စီလွှတ်ပေးတဲ့ လွတ်/ငြိမ်းမှာ အကျဉ်းထောင် ၃၄ ထောင်က နိုင်ငံရေးအကျဉ်းသား ၄၄၅ ဦးသာ လွတ်မြောက်ခဲ့ပြီး ကျန်တဲ့လွတ်လာသူ ၉,၁၀၀ ကျော်ဟာ ခိုးဆိုး၊ လုနှိုက်အမှုတွေနဲ့ အကျဉ်းကျခံနေသူ တွေသာဖြစ်တယ်လို့ PPN-Myanmar ရဲ့ အချက်အလက်အရသိရပါတယ်။
နိုင်/ကျဥ်းတွေ လွတ်မြောက်လာတဲ့ထောင်တွေကတော့ မန္တလေးအိုးဘိုထောင်မှ ၁၄၀ ဦး၊ ကျိုက်မရောထောင်မှ ၁၉ ဦး၊ ပုသိမ်ထောင်မှ ၃ ဦး၊ သထုံထောင်မှ ၇ ဦး၊ တောင်လေးလုံးထောင်မှ ၁၆ ဦး၊ လားရှိုးထောင်မှ ၁ ဦး၊ ဘားအံထောင်မှ ၇ ဦး၊ ဖားကန့်အချုပ်ထောင်မှ ၂ ဦး၊ မြိတ်ထောင်မှ ၃ ဦး၊ ထားဝယ်ထောင်မှ ၃ ဦး၊ မြောင်းမြထောင်မှ ၁ ဦး၊ အင်းစိန်ဗဟိုထောင်မှ ၂၃၀ ကျော်တို့ဖြစ်တယ်လို့ PPN-Myanmar က သိရပါတယ်။
