ကရင်ပြည်နယ် မြ၀တီမြို့နယ် လက်ခတ်တောင်ဒေသ၌ ယနေ့နံနက်ကစ၍ တိုက်ပွဲများပြင်းထန်နေပြီး စစ်ကောင်စီတပ်က လေကြောင်းပစ်ကူပေးတိုက်ခိုက်လာကြောင်း ကရင်အမျိုးသားအစည်းအရုံး(KNU) သတင်းရင်းမြစ်က ပြောသည်။
ယနေ့(ဩဂုတ် ၁၅ရက်) နံနက် ၅နာရီခန့်တွင် စစ်ကောင်စီနှင့် နယ်ခြားစောင့်တပ်(BGF) ပူးပေါင်းပြီး တော်လှန်ရေးပူးပေါင်းတပ်ဖွဲ့သိမ်းယူထားသည့် လက်ခတ်တောင်ဒေသကို ပြန်လည် ရယူရန် ထိုးစစ်ဆင်လာ၍ တိုက်ပွဲပြင်းထန်နေခြင်းဖြစ်သည်။ စစ်ကောင်စီတပ်က လက်နက်ကြီးပစ်ကူ အမြောက်အများသုံးထိုးစစ်ဆင်လာပြီး လေကြောင်းပစ်ကူလည်း လာရောက်တိုက်ခိုက်ခဲ့သည်ဟု ဆိုသည်။
“အခုတော့ ချနေတုန်းပဲ။ သူတို့ ပြောတာတော့ လေယာဉ်သုံးစီးတော့လာတယ်။ တိုက်လေယာဉ်နဲထင်တယ်။ အထိအခိုက် တော့မကြားသေးဘူး။ သူတို့ ထိုးလာတဲ့ စစ်ကြောင်း သုံးကြောင်း မှာ နှစ်ကြောင်းတော့ ပြန်ဆုတ်ပြီ။ ပြန်ပြီးတော့ ဘယ်လိုလုပ်မလဲတော့ မပြောတက်ဘူး”ဟု KNU သတင်းရင်းမြစ်က ပြောသည်။
စစ်ကောင်စီတပ်စစ်ကြောင်းများ ပြန်လည်ဆုတ်ခွာသွားခြင်းမှာ တော်လှန်ရေးတပ်ဖွဲ့များဘက်က အသာရ၍ဟုဆိုနိုင်ကြောင်း ၎င်းက ပြောသည်။
စစ်ကောင်စီတပ်အနေဖြင့် လေကြောင်းတိုက်ခိုက်မှုမှအပ မြေပြင်စစ်ရေးတွင် ထိရောက်စွာ ဆောင်ရွက်နိုင်ခြင်းမရှိဟု သတင်းရင်းမြစ်က သုံးသပ်သည်။
လက်ခတ်တောင်စစ်ကောင်စီစခန်းကို KNUဦးဆောင်သည့် ပူးပေါင်းတပ်က ဇူလိုင် ၂၁ရက်တွင် တိုက်ခိုက်သိမ်းပိုက်ထားခြင်းဖြစ်သည်။ စစ်ကောင်စီက ဇူလိုင် ၂၄ရက်ကစ၍ ပြန်လည်ထိုးစစ်ဆင်လျက်ရှိရာ တိုက်ပွဲ ၁၀ကြိမ်ထက်မနည်းဖြစ်ခဲ့ပြီး စစ်ကောင်စီတပ်က အရာရှိအပါအဝင် သေဆုံးထိခိုက်မှုများပြားခဲ့သည်။
ယနေ့နံနက်တွင်မူ ယခင်ထက် အင်အားဖြည့်တင်းပြီး လက်နက်ကြီးပစ်ကူအလွန်အကျွံသုံး၍ ထိုးစစ်ဆင်လာခြင်း ဖြစ်သည်။
