မုန်တိုင်းဘေးကြုံနေရသည့် ရခိုင်ပြည်သူများအတွက် ရှမ်းပြည်တိုးတက်ရေးပါတီ(SSPP)၊ မိုင်းလားတပ်ဖွဲ့(NDAA)၊ မွန်ပြည်သစ်ပါတီ(NMSP) တို့က ရက္ခိုင်အမျိုးသားအဖွဲ့ချုပ်(ULA/AA) ထံ အလှူငွေများပေးအပ်ခဲ့သည်။
ထိုသို့ အလှူငွေပေးအပ်ရာ၌ မိုင်းလားတပ်ဖွဲ့က ကျပ်သိန်း ၂,၀၀၀၊ SSPPက ကျပ်သိန်း ၁,၀၀၀ နှင့် NMSP က ကျပ်သိန်း ၅၀၀ တို့ဖြစ်ပြီး AA ခေါင်းဆောင် ဗိုလ်ချုပ်ထွန်းမြတ်နိုင်က ကျေးဇူးတင်လွှာ ပြန်လည်ပေးအပ်ခဲ့သည်။
မုန်တိုင်းဘေးကြောင့် ရက္ခိုင်ပြည်သူလူထု ဒုက္ခရောက်နေသည့်အချိန်တွင် ယခုကဲ့သို့ မိတ်ဆွေပီသစွာ ၊ မဟာမိတ်ပီသစွာ ပံ့ပိုးကူညီပေးမှုအပေါ် လှိုက်လှိုက်လှဲလှဲ ကျေးဇူးတင်ကြောင်း AA ခေါင်းဆောင်၏ ကျေးဇူးတင်လွှာ၌ ဖော်ပြသည်။
ယခင်ကလည်း ရခိုင်ဒေသမုန်တိုင်းဘေးအတွက် အမျိုးသားညီညွတ်ရေးအစိုးရ(NUG)က ကျပ်သိန်း၁,၀၀၀၊ ကချင်လွတ်လပ်ရေးအဖွဲ့(KIO)က ကျပ်သိန်း ၃,၀၀၀၊ ကိုးကန့်တပ်ဖွဲ့(MNDAA)က ကျပ်သိန်း ၁,၀၀၀၊ တအာင်းတပ်(TNLA)က ကျပ်သိန်း ၅၀၀ စသည်ဖြင့် AA တပ်ဖွဲ့ထံ အလှူငွေများ ပေးအပ်ခဲ့သည်ကို တွေ့ရသည်။
AA အနေဖြင့်လည်း မုန်တိုင်းဘေးပြန်လည်ထူထောင်ရေးအတွက် ကော်မတီတစ်ရပ်ဖွဲ့စည်းဆောင်ရွက်လျက်ရှိရာ AA ဒုစစ်ဦးစီးချုပ် ဒေါက်တာညိုထွန်းအောင်က အဖွဲ့ခေါင်းဆောင်အဖြစ်တာဝန်ယူပြီး AA စစ်ဒေသမှူး၊ နိုင်ငံရေးမှူးများအပြင် ပြည်တွင်း ပြည်ပ ရခိုင်ပြည်သူများ ပါဝင်သည်။ ထို့ပြင်မြို့နယ်များ၌ လူငယ်အစုအဖွဲ့များ စုဖွဲ့ပြီး မုန်တိုင်းဘေး ပြန်လည်ထူထောင်ရေးအတွက် ပါဝင်ကူညီကြရန် AAက တိုက်တွန်းဆောင်ရွက်လျက်ရှိသည်။
