စစ်ကိုင်းတိုင်း၊ ကနီနဲ့ မင်းကင်းမြို့နယ်တွင်းက အလင်းဝင်လာတဲ့ စစ်ကောင်စီလက်အောက်ခံ ၃ ဦးကို ဆုငွေတွေချီးမြှင့်ပေးခဲ့တယ်လို့ Anti – Dictatorship People Revolution’s Army က ဒီနေ့ နိုဝင်ဘာ ၂၅ ရက်မှာ ထုတ်ပြန်ပါတယ်။
ကနီရဲစခန်းက ရဲတပ်သားတစ်ဦးဟာ G 3 အမျိုးအစားသေနတ် (၁) လက်၊ ကျည်ဘောက် (၃) ခု၊ ကျည် (၁၅၆) တောင့်နဲ့အတူ နိုဝင်ဘာ ၂၀ ရက်နေ့က အလင်းဝင်ခဲ့ရာ ADPRA က ဆုငွေ ကျပ်သိန်း ၃၀ ချီးမြှင့်ခဲ့တယ်လို့ သိရပါတယ်။
နိုဝင်ဘာ ၂၁ ရက်နေ့ကလည်း ကနီမြို့နယ်၊ အလယ်ကျွန်းပျူစောထီးကျေးရွာက ပြည်သူ့စစ် ၁ ဦး ကာဘိုင်အမျိုးအစား သေနတ် ၁ လက်၊ ကာဘိုင်ကျည် ၂၀၀၊ 5.56 ကျည် ၁၂၂ တောင့်၊ ကျည်ဘောက် ၂ ဘောက်နဲ့ အလင်းဝင်လာခဲ့ရာ ဆုငွေ ကျပ်သိန်း ၂၀ ချီးမြှင့်ခဲ့တယ်လို့လည်း ADPRA က ထုတ်ပြန်ချက်မှာ ဖော်ပြထားပါတယ်။
ဒါ့အပြင် မင်းကင်းမြို့နယ်၊ မောက်ကတော် ရဲစခန်းက ရဲတပ်သားဟာလည်း ကနီမြို့ပေါ်ကနေတဆင့် ဆက်သွယ်လာပြီး လက်နက်တွေမပါဘဲ ဆိုင်ကယ် ၁ စီးနဲ့ အလင်းဝင်လာခဲ့ရာ အဆိုပါ ရဲတပ်သား သွားလိုရာကို သွားနိုင်ဖို့အတွက် လိုအပ်တဲ့ ငွေကြေးထောက်ပံ့မှုတွေ ပေးခဲ့တယ်လို့ ADPRA က ပြောထားပါတယ်။
ADPRA အနေနဲ့ အလင်းဝင်ရောက်လာတဲ့ စစ်ကောင်စီလက်အောက်ခံတွေကို ကောင်းမွန်စွာကြိုဆိုခဲ့ပြီး အလင်းဝင်သူတို့ရဲ့ သဘောဆန္ဒတွေကိုမေးမြန်းကာ ဖြစ်စေချင်တဲ့ ဆန္ဒအတိုင်း ဆောင်ရွက်ပေးတယ်လို့ ထုတ်ပြန်ချက်မှာ ဖော်ပြထားပါတယ်။
ဒါ့အပြင် ထပ်မံအလင်းဝင်ရောက်လိုသူတွေကို ကြိုဆိုကာ ထိုက်သင့်တဲ့ ဆုကြေးငွေတွေပေးအပ်သွားမှာဖြစ်ပြီး တိုက်ပွဲအတွင်း လက်နက်ချပါက စစ်သုံ့ပန်းအဖြစ် ဖမ်းဆီးအရေးယူမယ်လို့လည်း ထုတ်ပြန်အသိပေးထားပါတယ်။
