ကချင်လွတ်လပ်ရေးတပ်မတော်(KIA) ဌာနချုပ် လိုင်ဇာအနီးကို စစ်ကောင်စီက လက်နက်ကြီးဖြင့် ပစ်ခတ်တိုက်ခိုက်ခဲ့ကြောင်း ညီနောင်မဟာမိတ်(၃)ဖွဲ့က သတင်းထုတ်ပြန်သည်။
နိုဝင်ဘာ ၃၀ရက် ည ၁၂နာရီအချိန်တွင်လည်း စစ်ကောင်စီ၏ လက်နက်ကြီးစခန်းတစ်ခုဖြစ်သော ခါယာတောင်တပ်စခန်းမှ လိုင်ဇာအနီးတဝိုက်နှင့် ရက္ခိုင့်တပ်တော်(AA) တပ်စခန်းရှိရာ မုန်လိုင်ခတ်တပ်စခန်းသို့ လက်နက်ကြီးများဖြင့် ပစ်ခတ်တိုက်ခိုက်ခဲ့ခြင်းဖြစ်သည်ဟု ဖော်ပြသည်။
စစ်ကောင်စီသည် ခရစ်ယာန်ဘာသာဝင်တို့၏ အထွဋ်အမြတ်အလေးထားရာ Sweet December နေ့ကို တမင်တကာရည်ရွယ်ပြီး ပစ်ခတ်တိုက်ခိုက်ခဲ့ခြင်းပင် ဖြစ်ကြောင်း ထုတ်ပြန်သည်။
ရက္ခိုင်ဒေသစစ်ရေးအခြေအနေကို ဖော်ပြရာ AAက ရက္ခိုင်ဒေသတွင်း စစ်ဆင်ရေးစတင်သည့်နေ့မှစ၍ AA နှင့် ဆက်စပ်ပတ်သက်သည်ဟူသော စွပ်စွဲချက်များဖြင့် အပြစ်မဲ့အရပ်သားပြည်သူများအား နေ့စဉ်ရက်ဆက် ဖမ်းဆီးလာခဲ့ရာ အရပ်သားပြည်သူ၁၀၀နီးပါးမှာ စစ်ကောင်စီ၏ အင်အားသုံးဖမ်းဆီးမှုကို ခံနေရ သည်ဟု ဖော်ပြထားသည်။
စစ်ကောင်စီတပ်က ရခိုင်ဒေသ ကျေးရွာများကို လက်နက်ကြီးဖြင့် ရည်ရွယ်ချက်ရှိရှိ ပစ်ခတ်တိုက်ခိုက်မှုများ လုပ်ဆောင်နေသည်ဟု အသိပေးသည်။ နိုဝင်ဘာ ၂၉ရက်က မင်းပြား တိုင်းဗဟို (၉)စစ်ကောင်စီတပ်စခန်းမှ အနီးအနားရှိ ကျေးရွာများအား လက်နက်ကြီးများဖြင့် အဆက်မပြတ် ရည်ရွယ်ချက်ရှိရှိ တမင်တကာ ရမ်းသန်းပစ်ခတ်ခဲ့ရာ မင်းပြားမြို့နယ်၊ အိုးပုံတောင်ကျေးရွာထဲသို့ လက်နက်ကြီးကျည် ကျရောက်ပေါက်ကွဲကာ (၂)နှစ်အရွယ် ကလေးငယ် အပါအဝင် ပြည်သူ လေးဦး ဒဏ်ရာရခဲ့သည်ဟု ထုတ်ပြန်သည်။
စစ်ကောင်စီသည် မိမိတို့ စစ်ဆင်ရေးစတင်သည့်အချိန်မှစ၍ ၎င်း၏ ဗျူဟာကျတပ်စခန်းကြီး၊ ငယ်များနှင့် ရဲဘက် ဆိုင်ရာစခန်းများကိုပါ လက်လွတ်ဆုံးရှုံးနေရသဖြင့် မိုက်ရူးရဲဆန်ကာ အရပ်သားပြည်သူများကိုသာ တမင်ရည်ရွယ် ပစ်မှတ်ထားတိုက်ခိုက်နေကြောင်း ဖော်ပြသည်။
အရပ်သားပြည်သူများ၏ အခြေခံလူ့အခွင့်အရေးများကို ရသည့်ဘက်မှ တားမြစ်ပိတ်ပင် ကာ စားနပ်ရိက္ခာကုန်စည်စီးဆင်းမှု၊ လမ်းပန်းဆက်သွယ်ရေးနှင့် သတင်းအချက်အလက်ဖြတ်တောက်ခြင်းတို့အပြင် ကျန်းမာရေး၊ လူမှုရေးကိစ္စများကိုပါ တင်းတင်းကြပ်ကြပ် ပိတ်ပင်လာသည်ကို တွေ့ရှိရကြောင်း ထုတ်ပြန်သည်။
