ကချင်လွတ်လပ်ရေးတပ်မတော်(KIA) ဌာနချုပ် လိုင်ဇာအနီး ဒေသဖြစ်သည့် မိုးမောက်မြို့နယ် အောင်ဂျာကျေးရွာအနီးတွင် ယမန်နေ့ညပိုင်းက တိုက်ပွဲပြင်းထန်ခဲ့ကြောင်း ကချင်ဒေသ စစ်ရေးသတင်းရင်းမြစ်က ပြောသည်။
KIA နှင့် စစ်ကောင်စီတပ်တို့သည် လိုင်ဇာဌာနချုပ်နယ်မြေများအနီး ဇူလိုင်လဆန်းမှစ၍ တိုက်ပွဲများ ဆက်တိုက်ဖြစ်ပွားလျက်ရှိရာ မြစ်ကြီးနား-ဗန်းမော်လမ်း အောင်ဂျာရွာအနီးတွင် အောက်တိုဘာ ၄ရက်ညနေ ၇နာရီတွင် တိုက်ပွဲဆက်လက်ပြင်းထန်ခဲ့သည်ဟု ဆိုသည်။
“အောင်ဂျာဘက် တိုက်ပွဲပြင်းထန်တယ်။ ညသန်းခေါင်မှာ တံတားဦးက တက်လာတဲ့ ဂျက်ဖိုက်တာ ၂စီးနဲ့ အောင်ဂျာနဲ့ လွယ်လွန်တောင်ကျော်ဘက် ဗုံးလာကြဲသွားတယ်”ဟု ကချင်ဒေသစစ်ရေးသတင်းရင်းမြစ်က ပြောသည်။
ယမန်နေ့ ည ၁၁နာရီ ၃၇ မိနစ် ၊ ၁၁နာရီ ၄၀မိနစ်၊ ၁၁နာရီ ၄၅မိနစ်နှင့် ၁၁နာရီ ၅၁မိနစ်တို့တွင် လေကြောင်း တိုက်ခိုက်ခဲ့ခြင်းဖြစ်ကြောင်း ၎င်းက ပြောပြသည်။
တိုက်ပွဲဖြစ်ပွားမှုနှင့် လေကြောင်း တိုက်ခိုက်မှုများကြောင့် ထိခိုက်မှုရှိ၊မရှိ အခြေအနေကို စုံစမ်းနေဆဲဖြစ်သည်။
အဆိုပါ အောင်ဂျာဒေသတွင် ယခင်ရက်များကလည်း KIAနှင့် စစ်ကောင်စီတို့ အပြန်အလှန် လက်နက်ကြီးဖြင့် တိုက်ခိုက်မှုများလည်းရှိခဲ့သည်။ အောင်ဂျာရွာအနီးရှိ စစ်ကောင်စီတပ်စခန်း ၁ခုကိုလည်း KIAက စက်တင်ဘာလအတွင်းက တိုက်ခိုက်သိမ်းပိုက်ထားသည်။
