အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ ရှမ်းပြည်နယ်တောင်ပိုင်း၊ အလယ်ပိုင်းတိုင်းစစ်ဒေသ ၃ ၊ အင်းလေး ပြည်သူ့ ကာကွယ်ရေး 1009 တပ်ရင်းရဲ့ ၁ နှစ်ပြည့် နှစ်ပတ်လည်နေ့ အထိမ်းအမှတ် နဲ့ စစ်သင်တန်းအပတ်စဥ် ၅ / ၂၀၂၃ သင်တန်းဆင်းပွဲ အခမ်းအနားကို ကျင်းပပြုလုပ်ခဲ့တယ်လို့ Inle People Defense Force _ IPDF က စက်တင်ဘာ ၁၁ ရက်စွဲနဲ့ ထုတ်ပြန်ထားပါတယ်။
အင်းလေး ပြည်သူ့ကာကွယ်ရေး ၁၀၀၉ တပ်ရင်းရဲ့ စက်တင်ဘာ ၁၁ ရက် တနင်္လာနေ့မှာ ကျရောက်ခဲ့တဲ့ ၁ နှစ်ပြည့်အခမ်းအနားကို တပ်ရင်း နောက်တန်းရှိ ရဲဘော်များ၊ရဲမေများ၊သင်တန်းသားများ ၊ ညီနောင်မဟာမိတ် တပ်ရင်းများနဲ့အတူ တာဝန်ရှိသူတွေကို အကျဥ်းချုံး ဖိတ်ကြားကျင်းပခဲ့ပါတယ်။
အဆိုပါ အခမ်းအနားမှာ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနမှ ပေးပို့တဲ့ သဝဏ်လွှာကိုဖတ်ကြားခြင်း၊ အင်းလေး ၁၀၀၉ တပ်ရင်း ပေါ်ပေါက်လာပုံ သမိုင်းအကျဥ်းကို ပြောကြားခြင်း၊ တိုက်ပွဲအတွေ့အကြုံများ ဝေမျှခြင်း၊ ပြည်သူ့ခုခံ တွန်းလှန်စစ်ကို အားပြုရှေ့ဆက်ရန် အားပေးစကားများ ပြောကြားခဲ့တယ်လို့ ဆိုပါတယ်။
အင်းလေး ပြည်သူ့ကာကွယ်ရေးတပ်ရင်းမှာ ရောက်ရှိနေတဲ့ လေတပ် CDM ရဲဘော်အား MOD မှပေးပို့တဲ့ ၂ နှစ်ပြည့် ခုခံ တွန်း လှန်စစ် ဂုဏ်ပြု သူရဲကောင်းမှတ်တမ်းပေးအပ်ခဲ့ပြီး၊ ၁ နှစ်တာ အတွင်း ၁၀၀၉ တပ်ရင်းမှ ရဲဘော်များရဲ့ စည်းကမ်းကောင်းမွန်ဆု၊ ရဲဝံ့ စွန့်စားဆု၊ အမိန့်နာခံမှုဆု နဲ့အတူ သင်တန်းသားအသစ် ရဲဘော် များရဲ့ သင်တန်းကာလတလျှောက် ကြိုးစားအားထုတ်လုပ်ဆောင်ချက်များအပေါ် အမှတ်ပေးစည်းမျဥ်း အလိုက် ဆုချီးမြှင့်ခဲ့တယ်လို့ ဖော်ပြထားပါတယ်။
