ညီနောင်မဟာမိတ်တပ်များ ဆင်နွှဲနေသည့် ‘၁၀၂၇ စစ်ဆင်ရေး’ကို ကြိုဆိုထောက်ခံကြောင်း ကရင်နီ(ကယား)ပြည်နယ်တွင် စစ်ကောင်စီကို တော်လှန်တိုက်ခိုက်နေသည့် ကရင်နီအမျိုးသားတိုးတက်ရေးပါတီ(KNPP) က ယနေ့ ထုတ်ပြန်လိုက်သည်။
တစ်နိုင်ငံလုံးရှိ တော်လှန်ရေးအင်အားစုများ၊ ပြည်သူများနှင့် နိုင်ငံတကာ အသိုင်းအဝန်းတို့မှ အကြမ်းဖက်စစ်အုပ်စုကို နိုင်ငံရေး၊ စစ်ရေးနှင့် ပိတ်ဆို့မှုအရ တစ်ပြိုင်တည်း ဝိုင်းဝန်း ခုခံတွန်းလှန်မည်ဆိုပါက စစ်အာဏာရှင်စနစ် မလွဲဧကန်ကျဆုံးမည်ဖြစ်ပြီး မိမိနိုင်ငံရေးပန်းတိုင်ကို ရောက်ရှိမည်ဖြစ်ကြောင်းလည်း ဖော်ပြထားသည်။
ထို့ကြောင့်’ ၁၀၂၇ စစ်ဆင်ရေး’ကို ကြိုဆိုရင်း ကျန်ရှိနေသေးသည့် တိုင်းရင်းသားတော်လှန်ရေးအဖွဲ့အစည်းအားလုံးတို့မှလည်း အရှိန်မြှင့်ပါဝင်လာကြရန် အလေးအနက် ဖိတ်ခေါ်ကြောင်း KNPPက ထုတ်ပြန်သည်။
KNPPအနေဖြင့် ကရင်နီပြည်နယ်တွင်သော်လည်းကောင်း၊ မြန်မာတစ်နိုင်ငံလုံးတွင်သော်လည်းကောင်း တော်လှန်ရေးအင်အားစုများနှင့် နိုင်ငံရေး၊ စစ်ရေးအရ ပူးပေါင်းဆောင်ရွက်လျက်ရှိပြီး ဖက်ဒရယ်ဒီမိုကရေစီ ပြည်ထောင်စုတည်ဆောက်နိုင်ရေးကို စုပေါင်းခေါင်းဆောင်မှုဖြင့် အောက်ခြေမှစ၍ အုတ်မြစ်ချတည်ဆောက်လျက်ရှိကြောင်း အသိပေးသည်။
စစ်ကောင်စီက နိုင်ငံရေးနယ်ပယ်တွင်ရှိနေသရွေ့ မိမိတို့ လိုလားသည့် ငြိမ်းချမ်းရေးနှင့် ဖက်ဒရယ်ဒီမိုကရေစီကိုတည်ဆောက်နိုင်မည်မဟုတ်၍ရှေးဦးစွာ စစ်ကောင်စီကို အမြစ်ပြတ် ဖယ်ရှားရေးသည် အခရာကျကြောင်းလည်း KNPPက ထုတ်ပြန်ခဲ့သည်။
