ကရင်ပြည်နယ်၊ မြဝတီမြို့က ၁ ရပ်ကွက်၊ ၃ ရပ်ကွက်၊ ၄ ရပ်ကွက်နဲ့ ၅ ရပ်ကွက်တို့ရှိ လူနေအဆောက်အဦတွေကို မေ ၉ ရက် မနက်ပိုင်းက စစ်ကောင်စီ ရဲတပ်ဖွဲ့နဲ့ ရပ်ကွက်အုပ်ချုပ်ရေးပိုင်းက လိုက်လံချိပ်ပိတ်ခဲ့တယ်လို့ မြို့ခံတွေက ပြောပါတယ်။
မနေ့မနက် ၉ နာရီလောက်က မြဝတီ၊ အမှတ် ၄ ရပ်ကွက်၊ ပြည်ခိုင်ဖြိုးလမ်းရှိ ခြံဝင်းအပါအဝင် နှစ်ထပ်ပျဉ်ထောင်အိမ်တလုံးကို အမှတ် ၄ အုပ်ချုပ်ရေးမှူးနဲ့ မြဝတီရဲစခန်းက ရဲ ၄ ဦးက အကြမ်းဖက်တိုက်ဖျက်ရေးဥပဒေ ၅၂(က) အရ ချိပ်ပိတ်ထားတဲ့ အိမ်ဆိုတဲ့ ဗီနိုင်းလာကပ်သွားတယ်လို့ သိရပါတယ်။
ရဲ ၄ ဦး လက်နက်အပြည့်အစုံပါ ကားတစီးနဲ့ အမှတ် ၃ ရပ်ကွက်၊ အဓိဋ္ဌာန်အောင် ၂ လမ်းရှိ အလျားပေ ၃၀၊ အနံ ၁၅ ပေရှိ နှစ်ထပ်တိုက်တလုံးနဲ့ အမှတ် ၅ ရပ်ကွက်၊ မလိခလမ်းရှိ ဆောက်လက်စ RC နှစ်ထပ်တိုက်နဲ့ ခြံကိုပါ ချိပ်ပိတ်သွားတာပါ။
မြို့ခံတဦးက “ရဲကားတစီးနဲ့လာတာ၊ ရပ်ကွက်ရုံးက လူကြီး ၂ ယောက်ပါတယ်။ ဒီ အမှတ် ၄ ထဲက အိမ်တလုံးနဲ့ အမှတ် ၃ ဘက်က ၂ ထပ်အိမ်တလုံးပါ စာကပ်သွားတယ်။ အဲ့အိမ်တွေက လူမရှိတာကြာပြီ” လို့ ပြောပါတယ်။
ချိပ်ပိတ်ခံရတဲ့ နေအိမ်တွေဟာ စစ်အာဏာသိမ်းမှု ဆန့်ကျင်ရေး လှုပ်ရှားမှုတွေကြောင့် စစ်ကောင်စီဘက်က အမှုဖွင့်ထားတဲ့သူတွေရဲ့ နေအိမ်တွေဖြစ်တယ်လို့ သိရပြီး အကြမ်းဖက်တိုက်ဖျက်ရေးဥပဒေ ၅၂(က) (ည) တွေနဲ့ အမှုဖွင့်ခံထားရပါတယ်။
အဲဒီနေ့ခင်းပိုင်းမှာပဲ မြဝတီမြို့နယ်၊ အမှတ် ၁ ရပ်ကွက်၊ ကံ့ကော်လမ်းမှာ ဖွင့်လှစ်ထားတဲ့ သုံးထပ်အဆောက်အဦ စံပယ်ဦး ဧည့်ရိပ်သာကိုပါ မမစ(မြဝတီ) (ပ) ၉၈/၂၀၂၃၊ အကြမ်းဖက်တိုက်ဖျက်ရေးဥပဒေပုဒ်မ ၅၀(ည)(စ) နဲ့ ချိပ်ပိတ်သော့ခတ်သွားတယ်လို့ သိရပါတယ်။
