မန္တလေးတိုင်း၊ ပြင်ဦးလွင်မြို့နယ်၊ အနီးစခန်းရဲကင်းရှေ့နားက သစ်ပင်လဲပြိုလဲခဲ့ပြီး တာဝန်ကျရဲတစ်ဦး သေဆုံးသွားတယ်လို့ ဒေသခံတွေက မဲခေါင်သတင်းဌာနကို ပြောပါတယ်။
ဒီနေ့မနက် ၈ နာရီခန့်က ရဲကင်းမှာရှိတဲ့ ရဲတပ်သားအပေါ် သစ်ပင်လဲကျခဲ့လို့ နေရာတွင်ပွဲချင်းပြီး သေဆုံးသွားတာ ဖြစ်တယ်လို့ မျက်မြင်တွေ့သူတစ်ဦး ကပြောပါတယ်။
“ပြင်ဦးလွင်အနီးစခန်းက ရဲတပ်သားသေသွားတာ။ ပြင်စာနယ်မြေစခန်းမှာ တာဝန်ကျတဲ့ရဲပေါ့။ သစ်ပင်လဲကျပြီး သူ့အပေါ်တည့်တည့် ကျတော့ပွဲချင်းပြီးဆုံးသွားတယ်။ လူမှုကူညီရေးအဖွဲ့တွေလာပြီးကူညီပေမယ့် အသက်တော့မမီလိုက်ဘူး” လို့ သူကပြောပါတယ်။
အနီးစခန်းရဲကင်းရှေ့နား သစ်ပင်လှဲကျခဲ့လို့ ရဲတပ်သားဟာ ဦးခေါင်းပွင့်ဒဏ်ရာနဲ့ နေရာတွင်ပင်သေဆုံးခဲ့ပြီး အလောင်းကိုတော့ ပြင်ဦးလွင်နာရေးကူညီမှုအသင်းကားနဲ့ ပြင်ဦးလွင်ပြည်သူ့ဆေးရုံကြီးကို ပို့ဆောင်ပေးထားတယ်လို့ သိရပါတယ်။
