သာစည်မြို့နယ်၊ ကျောက်ပချုပ်ကျေးရွာ အခြေစိုက် PDF စခန်းကို စစ်ကောင်စီနဲ့ ပျူစောထီးတွေ ဝင်ရောက် စီးနင်းခဲ့ပြီးနောက် ဖမ်းမိတဲ့ PDF တစ်ဦးကို အသုံးချပြီး ကရင်နီက PDF တွေကို ထောင်ဖမ်းဖို့ ကြိုးစားနေတယ်လို့ ရှမ်းတောင် တော်လှန်ရေး အင်အားစုက ပြောပါတယ်။
ကျောက်ပချုပ်ရွာမှာ မေလဆန်းပိုင်း ကတည်းက တိုက်ပွဲ ဖြစ်ပွါးနေတာဖြစ်ပြီး PDF အခြေစိုက် စခန်း တစ်ခုကို မေလ ၂၆ ရက်နေ့၊ နေ့လယ် ၂ နာရီခန့် တွင် စစ်ကောင်စီ စစ်ကြောင်းက အငိုက်ဖမ်း တိုက်ခိုက်ခဲ့လို့ စခန်းသိမ်းခံရပြီး PDF ရဲဘော်ဂျပန်ကြီး ဖမ်းဆီးခံခဲ့ရတာလို့ ဒေသခံ ပြည်သူတွေက ပြောပါတယ်။
“သူအဖမ်းခံရတာကို ကျနော်တို့ မသိခင် ကတည်းက မက်ဆင်ဂျာကနေ စကားလာပြန်ပြောပြီး ကျောက်ပချုပ်မှာ သူဆက်နေလို့ မရတော့ဘူး၊ စကစ က သူ့ကို ရိပ်မိလာလို့ ကရင်နီဖက်ကို သူလာခဲ့မယ်၊ သူ့ကို စီစဉ်ပေးပါ ဆိုပြီး ပြောတာ။ နောက်နေ့ကျမှ ဖမ်းခံထားရတဲ့ သတင်းကို တွေ့မှ ကျန်ရဲဘော်တွေကို ထောင်ဖမ်းမှန်း သိတာ” လို့ ရှမ်းတောင် တော်လှန်ရေး အင်အားစု တစ်ခုက ရဲဘော်ဦးနေ က မဲခေါင်သတင်းဌာနကို ပြောပါတယ်။
ရဲဘော်ဂျပန်ကြီး ဟာ ရွာငံ-သာစည် နယ်စပ်ကို စစ်ကြောင်း မထိုးခင် ကတည်းက ကရင်နီပြည် လာဖို့ ပြောထားတာဖြစ်ပြီး ဖမ်းဆီးခံရပြီးနောက် စစ်တပ်က သူ့ရဲ့ လက်ကိုင်ဖုန်းကို အသုံးပြုကာ ကရင်နီပြည် အတွင်းရှိ ရှမ်းတောင် တော်လှန်ရေး အင်အားစုတွေထံ ခိုလှုံလိုတဲ့ အတွက် အကူအညီပေးဖို့ ဟန်ဆောင် ဆက်သွယ်လာတာလို့ သူကဆက်ပြောပါတယ်။
ရဲဘော်ဂျပန်ကြီးနဲ့ အတူ လက်နက်ခဲယမ်းတွေ သိမ်းဆည်းရမိပြီး အကြမ်းဖက် ဥပဒေနဲ့ အရေးယူမယ်လို့ စစ်ကောင်စီ ဝါဒဖြန့် တယ်လီဂရန်ချန်နယ်တွေမှာ ရေးသား ဖော်ပြထားပါတယ်။
