တနင်္သာရီတိုင်း ပုလောမြို့နယ်တွင် လမ်းပိုင်းစစ် ဆေးရေးလုပ်ဆောင်နေသော KNU၊ PDF ပူးပေါင်းတပ်များကို စစ်ကောင်စီတပ်က အင်အားအလုံးအရင်းဖြင့် လာရောက်ပစ်ခတ်ရာမှ ထိတွေ့တိုက်ပွဲဖြစ်ပွားပြီး တိုက်ပွဲပြင်းထန်ခဲ့ကြောင်း မြိတ်ခရိုင် PDF တပ်ရင်း(၁)မှ တာဝန်ရှိသူတစ်ဦးက People’s Spring သတင်းဌာနသို့ ပြောသည်။
ယမန်နေ့(ဇွန် ၂၀)နေ့လယ် ၁၂ နာရီခွဲခန့်က ပုလောမြို့နယ် ပဝတ်ကုန်းကျေးရွာအနီး ဂိတ်ချစစ်ဆေးနေသော KNU၊ PDF ပူးပေါင်းတပ်များကို စစ်ကောင်စီတပ်မှ ပျူစောထီးအပါအဝင် အင်အား ၂၀၀ ဝန်းကျင်ဖြင့် လာရောက်တိုက်ခိုက်ခြင်းဖြစ်ကြောင်း မြိတ်ခရိုင် ရင်း(၁)က ပြောသည်။
“(စစ်တပ်)စစ်ကြောင်းတက်နေတာကြာပြီ မနေ့ကမှ ပွဲဖြစ်တာ။ အင်အား ၂၀၀ကျော်နိုင်တယ်။ တစ်ကြောင်းကို အများဆုံး ၁၀၀ကျော်နဲ့ အနည်းဆုံး ၈၀လောက်ပေါ့။ အားလုံးစစ်ကြောင်း သုံးကြောင်းနဲ့ လာတိုက်တာ”ဟု မြိတ်ခရိုင် PDF တပ်ရင်း(၁)မှ တာဝန်ရှိသူတစ်ဦးက People’s Spring သို့ ပြောသည်။
စစ်ကောင်စီတပ်စစ်ကြောင်းတွင် ပျူစောထီးအပါအဝင် စစ်ကောင်စီတပ်သားများသည် အပေါ်ပိုင်းအရပ်ဝတ်ဝတ်ထားကြပြီး ပြည်သူများအမြင်တွင် PDFပူးပေါင်းတပ်များနှင့် ထင်ယောင်ထင်မှားဖြစ်စေရန် ရည်ရွယ်ထားဟန်ရှိပြီး နှစ်ဖက်ပစ်ခတ်တိုက်ခိုက်ချိန် ၅ နာရီခန့်ကြာမြင့်ကြောင်း ၎င်းတာဝန်ရှိသူက ဆက်ပြောသည်။
အဆိုပါ တိုက်ခိုက်မှုအတွင် မြိတ်ခရိုင် တပ်ရင်း (၁)မှ ရဲဘော်တစ်ဦးကျဆုံးပြီး စစ်ကောင်စီတပ်ဘက်မှလည်း အများအပြားထိခိုက်သေဆုံးမှုရှိနိုင်သော်လည်း အရေအတွက်အား မသိရသေးပေ။
ယနေ့(ဇွန် ၂၁)တွင်လည်း KNU၊ PDF ပူးပေါင်းတပ်များမှ ဂိတ်စခန်းဖွင့်၍ လမ်းပိုင်းစစ်ဆေးမှုလုပ် ဆောင်ခြင်းမရှိသော်လည်း ပဝတ်ကုန်းအနီးဆက် လက်တပ်စွဲထားရာ ပလမြို့အခြေစိုက် စစ်ကောင်စီတပ်နှင့် ခမရ (၂၅၈)တပ်ရင်းများမှနေ၍ လက်နက် ကြီးပစ်ခတ်မှုများ ဆက်တိုက်လုပ်ဆောင်နေကြောင်း စုံစမ်းသိရသည်။
