ထားဝယ်မြို့၊ ကြက်စားပြင်ရပ်ကွက်က သတ္တုရုံးမှာ အခုရက်ပိုင်း စစ်ကောင်စီတပ်သားတချို့ လာရောက်ကင်းပုန်းဝပ်နေကြတယ်လို့ ရပ်ကွက်နေသူတွေကပြောပါတယ်။
လွန်ခဲ့တဲ့ ၅ ရက်လောက်ကစပြီးည ၇ နာရီလောက်မှာစစ်ကောင်စီတပ်သားတွေကို ကားနဲ့လာချခဲ့တာဖြစ်ပြီး မနက် ၃ နာရီလောက်မှပြန်လာကြိုသွားလေ့ရှိတယ်လို့ သိရပါတယ်။
“ပစ်တာခတ်တာဘာမှမရှိဘူး။ တိတ်တိတ်ကလေးနေနေကြတာမျိုးပါ။ အဲဒါကပိုပြီးစိုးရိမ်ရတယ်။ ညဘက်မသိဘဲလာတဲ့ သူတွေကိုရန်ရှာနိုင်တယ်။ စောမိညိုလမ်းဆုံမှာလိုပေါ့” လို့ ရပ်ကွက်နေသူတစ်ဦးကပြောပါတယ်။
ကင်းပုန်းဝပ်နေတဲ့ စစ်ကောင်စီတပ်သားဦးရေကတော့ ၅ ဦးဝန်းကျင်ရှိနိုင်တယ်လို့ သူကဆက်ပြောပါတယ်။
ပြီးခဲ့တဲ့ မေလ ၃၀ ရက်နေ့ကတော့ ဘုမ္မော်ရပ်ကွက် စောမိညိုဘုရားလမ်းဆုံမှာ မှောင်ရိပ်ခိုပြီး ကင်းပုန်းဝပ်နေတဲ့ စစ်ကောင်စီတပ်သားတွေက ခွေးအစာကျွေးဖို့ရောက်လာတဲ့ မြို့ခံအမျိုးသားနှစ်ဦးကိုပစ်သတ်ခဲ့ပါတယ်။
အဲဒီပစ်ခတ်မှုမှာတော့ ထားဝယ်မြို့ခံတွေဖြစ်တဲ့ ကိုဟိန်းဇော်အောင်နဲ့ ကိုအောင်အောင်တို့ သေဆုံးခဲ့ပါတယ်။
အဲဒီပစ်ခတ်မှုဖြစ်ပွားပြီးနောက်မှာတော့ စောမိညိုလမ်းဆုံအနီးမှာ ကင်းပုန်းဝပ်တာမျိုးမရှိတော့ဘူးလို့သိရပါတယ်။
ထားဝယ်မြို့ပေါ်မှာ ကင်းလှည့်တာနဲ့ နေအိမ်တွေမှာ ရှောင်တခင်ဝင်ရောက်စစ်ဆေးတာတွေကိုတော့ လက်ရှိအချိန်ထိ လုပ်ဆောင်နေဆဲဖြစ်တယ်လို့ မြို့ခံတွေဆီကနေသိရပါတယ်။
