ကရင်ပြည်နယ်၊ သံတောင်ကြီးမြို့နယ်၊ ယာဒိုကျေးရွာထိပ်က စစ်ကောင်စီ စခန်းတစ်ခုကို ဒီနေ့ ဇူလိုင် ၁၁ ရက်၊ မနက် ၆ နာရီ ဝန်းကျင်က ဝင်ရောက်တိုက်ခိုက်တဲ့ တော်လှန်ရေးတပ်ဖွဲ့တွေ ပြန်ဆုတ်ခွာသွားပြီလို့ ဒေသခံတွေက ပြောပါတယ်။
အဆိုပါ စခန်းဟာ ကေအဲန်ယူ အုပ်ချုပ်နယ်မြေ၊ တပ်မဟာ (၂) ဧရိယာမှာ ပါဝင်နေတဲ့ တောင်ငူ-လိပ်သို-ယာဒို-လွိုင်ကော် လမ်းမှာရှိပြီး ကရင်နီပြည်နယ်ကို စစ်ကောင်စီတပ် အင်အားနဲ့ ရိက္ခာ သယ်ပို့တဲ့ လမ်းကြောင်း တစ်ခု ဖြစ်တယ်လို့လည်း သိရပါတယ်။
“ဒီနေ့မနက်ကနေ စဖြစ်တယ်လို့ ပြောတယ်ဗျ။ အခုတော့ ငြိမ်သွားပါပြီ။ အထိအခိုက် အတိအကျ မသိရဘူး။ စခန်းတော့ မသိမ်းနိုင်သေးဘူး။ ဘယ်အဖွဲ့တွေ ပါဝင်လဲ ဆိုတာ အတိအကျ ပြောလို့ မရပါဘူး” လို့ ဒီနေ့ ညနေ ၃ နာရီခွဲဝန်းကျင်မှာ Kayan Region Leftist Youths – KRLY အဖွဲ့ တာဝန်ရှိသူက မဲခေါင်သတင်းဌာနကို ပြောပါတယ်။
ယာဒိုကျေးရွာထိပ်က စစ်ကောင်စီစခန်းမှာ စစ်သားနဲ့ ရဲ ပူးပေါင်း အင်အား ၃၀ ဝန်းကျင်နဲ့ စခန်းထိုင်တာဖြစ်ပြီး ဒေသခံတွေကို အစစ်အဆေး တင်းကြပ်တာ အပြင် ဆီ၊ ဆန်၊ ဆေးဝါး စတဲ့ ရိက္ခာ သယ်ယူတာတွေ ကန့်သတ်ထားတယ်လို့ ဒေသခံတွေက ဆိုပါတယ်။
ယာဒိုကျေးရွာ ဒေသခံ အများစုဟာ ဒီမနက် တိုက်ပွဲကြောင့် နေရပ်စွန့်ခွာ ထွက်ပြေး တိမ်းရှောင် ခဲ့ရတယ်လို့ သိရပါတယ်။
စစ်ကောင်စီတပ်ရဲ့ တပ်မ (၆၆) တပ်ဖွဲ့ဝင်တွေဟာ တောင်ပိုင်းတိုင်း စစ်ဌာနချုပ်က တစ်ဆင့် ၂၀၂၁ ခုနှစ်၊ ဇွန်လ ၇ ရက်နေ့ကစပြီး ကရင်နီ-ကရင်ပြည် နယ်စပ် ယာဒိုကျေးရွာဘက်မှာ အင်အားအလုံးအရင်းနဲ့ ဝင်ရောက် တပ်စွဲခဲ့တာ ဖြစ်ပါတယ်။
