စစ်ကိုင်းတိုင်း တမူးမြို့မှ ကုန်သည်မိသားစုကို စစ်ကောင်စီလက်ပါးစေ ပျူစောထီးများက ဓားပြတိုက်ပြီး မိသားစုဝင်သုံးဦးကို သတ်ဖြတ်သွားကြောင်း အဆိုပါမြို့ခံများက ပြောသည်။
တမူးမြို့၊ စန္ဒကူးရပ်ကွက်တွင်နေထိုင်သော ကုန်သည်ဒေါ်အေး၏ နေအိမ်ကို ပျူစောထီး ခုနစ်ဦးက ဇူလိုင် ၂၄ရက် ညအစောပိုင်းတွင် ဝင်ရောက်ဓားပြတိုက်ပြီး ဒေါ်အေးနှင့် သားတစ်ဦး၊ သမီးတစ်ဦးကိုပါ သတ်ဖြတ်သွားခြင်းဟု စန္ဒကူးရပ်ကွက်ဒေသခံများက ပြောသည်။
“ညမိုးမချုပ်ခင် ဝင်တိုက်တာ။ ပျုတွေပဲ သွားလာနေကြတဲ့ အချိန်ပါ။ ဝင်တိုက်တာလည်း ပျူစောထီးအုပ်စုပါပဲ။မြို့ခံတွေ သိကြပါတယ်”ဟု စန္ဒကူးရပ်ကွက်တွင် နေထိုင်သူတစ်ဦးကပြောသည်။
ဒေါ်အေး၏ ခင်ပွန်းသည် အိန္ဒိယနိုင်ငံ မိုးရေးမြို့တွင် ရောက်ရှိနေပြီး သားအကြီးဖြစ်သူလည်း နေအိမ်ပြင်ပတွင်ရှိနေ၍ အသတ်မခံရခြင်းဖြစ်ကြောင်း မြို့ခံများက ဆိုသည်။အဆိုပါ ဓားပြမှုကြောင့် အသက်(၄၈)နှစ်အရွယ် ဒေါ်အေး၊ အသက်(၁၆)နှစ်အရွယ် သားဖြစ်သူ မောင်ပြည့်လျှံနှင့် အသက် (၂၁)နှစ်အရွယ်သမီးဖြစ်သူ မငြိမ်းငြိမ်းတို့ အသတ်ခံခဲ့ရသည်။
“မောင်ပြည့်လျှံကိုအိမ်ကနေ ထွက်ခိုင်းပြီး ဖုန်းယူခိုင်းတယ်။ ပြန်မလာရင် မင်းအမေနဲ့ အမကို သတ်မယ်ဆိုပြီး ပြောတယ်။ ကလေးက ဖုန်းရှာပြီး သွားပေးတော့ သုံးယောက်စလုံးကို သတ်ပစ်တာ”ဟု ရပ်ကွက်တွင် နေထိုင်သူတစ်ဦးက ပြောသည်။
ဒေါ်အေးတို့မိသားစုအား ဓားပြတိုက်ပြီးသတ်ဖြတ်သွားသူများမှာ ပျူစောထီးများဖြစ်ကြောင်း မြို့ခံများအပြင် စစ်ကောင်စီလက်အောက်ခံ ရဲတပ်ဖွဲ့နှင့် နီးစပ်သူများကလည်း ပြောသည်။
ဒေါ်အေး၏ အမျိုးသားနှင့် သားကြီးဖြစ်သူသည် ထပ်မံသတ်ဖြတ်ခံရမည်ကို စိုးရိမ်သောကြောင့် ထွက်ပြေးတိမ်းရှောင်နေရသည်ဟု ဆိုသည်။ ထို့ကြောင့် ဒေါ်အေးတို့မိသားစု၏ နာရေးကို မိသားစုဝင်များမရှိ၍ ရပ်ကွက်က ပြုလုပ်ပေးခဲ့ရသည်။
အဆိုပါ နာရေးအား ဦးဆောင်ပြုလုပ်ပေးသူတစ်ဦးကိုလည်း စစ်ကောင်စီက ဖမ်းဆီးလိုက်သည်ဟု သတင်းရရှိသည်။ ဖမ်းဆီးခံရသူအမျိုးသူ အမျိုးသားသည် ယခုအခါ တစ်မူးမြို့ရဲစခန်းအချုပ်၌ ရှိနေကြောင်း ရဲသားစုဝင်တစ်ဦးက ပြောသည်။
