စစ်ကိုင်းတိုင်း၊ မုံရွာမြို့၊ လူစည်ကားတဲ့နေရာတစ်ခုဖြစ်တဲ့ ကန်သာယာအနီးမှာ မနေ့ သြဂုတ် ၈ ရက်နေ့က ရှစ်လေးလုံး(၈၈၈၈) အထိမ်းအမှတ် နှစ်ပတ်လည်ဆန္ဒပြပွဲ ပြုလုပ်နေစဉ် စစ်ကောင်စီအဖွဲ့က အိမ်စီးကားနဲ့ ရောက်လာပြီး သေနတ်နဲ့ပစ်ခတ်ခဲ့တယ်လို့ သိရပါတယ်။
ကန်သာယာအနီးက ပြည်ထောင်စုလမ်းမပေါ်မှာ မနေ့ညနေပိုင်းက ဆန္ဒပြနေစဉ်မှာ ပစ်ခတ်ဖြိုခွင်းခံခဲ့ရတာဖြစ်ပြီး လူငယ် ၃ ယောက်ကိုလည်း အရပ်ဝတ်နဲ့ သေနတ်ကိုင်ထားတဲ့ သူတွေက ဖမ်းဆီးခေါ်ဆောင်သွားကြတယ်လို့ သိရပါတယ်။
“(ဆန္ဒပြပွဲကို) ဓာတ်ပုံရိုက်နေတုန်းရှိသေးတယ်၊ အိမ်စီးကားနဲ့ ရောက်လာပြီး သေနတ်နဲ့ တန်းပစ်တော့တာပါပဲ” လို့ မုံရွာလူထုသပိတ်တိုက်ပွဲ ဦးဆောင်ကော်မတီက မဲခေါင်သတင်းဌာနကို ပြောပါတယ်။
သေနတ်နဲ့ပစ်ခတ်တဲ့အတွက် ထိခိုက်ဒဏ်ရာရှိသူတွေလည်း ရှိပြီး ဖမ်းဆီးခံခဲ့ရတဲ့ ၃ ယောက်ကိုတော့ လက်ရှိအချိန်အထိ အဆက်အသွယ်မရသေးဘူးလို့ ဆိုပါတယ်။
ဝင်ရောက်ပစ်ခတ်သူတွေဟာ အင်အား ၆ ယောက်၊ ၇ ယောက်ခန့်ရှိပြီး အိမ်စီးကားနဲ့လာတဲ့အပြင် အရပ်ဝတ်တွေ ဝတ်ဆင်ထားတယ်လို့ ဆိုပါတယ်။
ဖမ်းဆီးခံရတဲ့ လူငယ် ၃ ယောက်ကို စစ်ကောင်စီအဖွဲ့က ဖမ်းဆီးနှိပ်စက်တာတွေ လုပ်နေတယ်လို့ မုံရွာလူထုသပိတ်တိုက်ပွဲ ဦးဆောင်ကော်မတီက သူတို့သိရှိထားတဲ့ အချက်အလက်တွေကို မနေ့က ထုတ်ပြန်ပါတယ်။
မုံရွာလူထုသပိတ်တိုက်ပွဲ ဦးဆောင်ကော်မတီမှ ရဲဘော်အချို့ဟာ မနေ့ ရှစ်လေးလုံး အရေးတော်ပုံနေ့ နှစ်ပတ်လည်အထိမ်းအမှတ်အဖြစ် မုံရွာ-အမြင့်လမ်း သပိတ်ဦးဆောင်ကော်မတီနဲ့ ပူးပေါင်းပြီး ကျေးရွာတစ်ရွာဆန္ဒပြပွဲတစ်ခု ပြုလုပ်ခဲ့ပါသေးတယ်။
