ကရင်အမျိုးသားအစည်းအရုံး (KNU) တပ်မဟာ ၃ နယ်မြေထဲက မုန်းမြို့နယ် ဖိုးသောင်းစုကျေးရွာဘက်ကို စက်တင်ဘာ ၇ ရက် မနက် ၆ နာရီလောက်က စစ်ကောင်စီစစ်ကြောင်းက လက်နက်ကြီး ပစ်ခတ်ပြီး ဝင်လာတာကြောင့် ဒေသခံ ၇၀၀ ကျော်ဟာ ထွက်ပြေးတိမ်းရှောင်နေရတယ်လို့ တပ်မဟာ ၃ တာဝန်ရှိသူက ပြောပါတယ်။
စစ်ကောင်စီရဲ့ သစ်ချဆိပ်တပ်စခန်းသိမ်းပိုက် ဖျက်ဆီးခံရပြီးနောက် စစ်ကောင်စီတပ်တွေက စခန်းရှင်းလင်းရေးအတွက် စခန်းအနီးက ကျေးရွာတွေအတွင်းကို စစ်ကြောင်းထိုး ဝင်ရောက်လာတာကြောင့် စက်တင်ဘာ ၆ ရက်နေ့က မျက်ရဲဗမာကျေးရွာမှာ တိုက်ပွဲဖြစ်ပွားခဲ့ပါတယ်။
တိုက်ပွဲဖြစ်ပွားပြီးနောက် မျက်ရဲဗမာကျေးရွာအတွင်းမှာ စစ်ကောင်စီစစ်ကြောင်းက ညအိပ်တပ်စွဲပြီး ဒီကနေ့မနက်ပိုင်းမှာ မျက်ရဲကရင်ကျေးရွာဘက်ကို ဝင်ရောက်လာတာကြောင့် နယ်မြေခံ KNLA တပ်ရင်း ၈၊ PDF ပူးပေါင်းတပ်ဖွဲ့တွေနဲ့ ထပ်မံတိုက်ပွဲဖြစ်ပွားခဲ့တာပါ။
တိုက်ပွဲအတွင်း စစ်ကောင်စီတပ်ဘက်က လက်နက်ကြီးပစ်ခတ်တာကြောင့် အိမ်ခြေ ၁၀၀ ကျော်ရှိ ဖိုးသောင်းစု ကျေးရွာက ဒေသခံ ၇၀၀ ကျော်ဟာ ထွက်ပြေးတိမ်းရှောင်ခဲ့ရတာပါ။
တပ်မဟာ ၃ တပ်မဟာမှူးက “မနေ့ကဝင်လာတဲ့ စစ်ကြောင်းနဲ့ မျက်ရဲဗမာအပိုင်းမှာ တိုက်ပွဲဖြစ်ပြီးတော့ ရန်သူက အဲဒီမှာထိုင်တယ်။ ဒီနေ့ မနက်မှာ မျက်ရဲကရင်အပိုင်းမှာ တိုက်ပွဲထပ်ဖြစ်တယ်။ ဖိုးသောင်းစုနဲ့ မျက်ရဲရွာက ဘယ်လောက်မှ မဝေးဘူး။ နာရီဝက်သွားရင် ရောက်တယ်။ ဒါကြောင့် ဒေသခံတွေက စိုးရိမ်ကြောက်လန့်ပြီး ထွက်ပြေးတာ” လို့ ပြောပါတယ်။
စက်တင်ဘာ ၃ ရက်နေ့ကစတင်ပြီး ၆ ရက်နေ့အထိ အထိနာနေတဲ့ စစ်ကောင်စီတပ်ဟာ မြေပြင်လက်နက်ကြီးအပြင် လေကြောင်းကနေပါ ဗုံးကြဲတိုက်ခိုက်ခဲ့ရာ ငထွေစုတ်၊ မျက်ရဲ၊ မရမ်းစိန်ကျေးရွာက ဒေသခံ ကလေးငယ်အပါအဝင် ၂ ဦးသေဆုံးပြီး ၁၀ ဦးဒဏ်ရာရရှိခဲ့တယ်လို့ တပ်မဟာ ၃ တာဝန်ရှိသူဆီက သိရပါတယ်။
